Dan Lasanble Nasyonal |13 April 2022

Apre Oktob 2020 ziska Desanm 2021 in napa okenn transfer later endistriyel ki’n finalize

Depi Zanvye ziska Oktob 2020 avan lenpozisyon en moratwar lo lavant e transfer bann later endistriyel dapre lenformasyon ki’n ranmase ziska prezan, in annan 4 transfer pour en siperfisi anviron 3600 met kare e dan bann dokiman konsernen zis en transfer ki montre peyman pour lavaler 100 mil roupi, larestan ti sipoze bann transfer kot zot valer ti zero.

Ansemoman i ankor annan rikord ki Lotorite Later Endistriyel (IEA) e Minister Lenvestisman, Lantreprenarya ek Lendistri pe rode me dapre rikord ki’n kapab etabli apre Oktob 2020 ziska Desanm 2021 in napa okenn transfer ki’n finalize e sa i prensipalman akoz sa moratwar me osi akoz gouvernman ti pe zet en regar pli profon e pli serye lo sa bann transfer.

Me zefor pe kontinyen pour met tou bann rikord azour.

Sete Minis responsab pour Lenvestisman, Lantreprenarya ek Lendistri, Madanm Devika Vidot, ki ti donn sa bann lenformasyon Lasanble yer bomaten letan i ti pe reponn en kestyon par MNA pour Mont Buxton Gervais Henrie lo sa size.

Onorab Henrie ti’n demann Minis Vidot konbyen lavant lease lo bann later zòn endistriyel ki gouvernman i okouran in arive pandan sa dernyen 2-an (ant Zanvye 2020 e Desanm 2021), ki siperfisi sa bann later i reprezante; ki sonm total sa bann lavant in arive e ki rezon prensipal pour sa bann transfer.

Minis Vidot in osi fer resorti ki depi Oktob - Novanm 2020 apre ki nouvo gouvernman ti pran lofis, Lotorite e later endistriyel ti ranpli avek labi, lenzistis e osi bann dezord.

I dir enn bann premye aksyon ki gouvernman ti pran se pour enpoz en moratwar lo bann lavant e transfer later pour kapab etabli enpe lord.

Minis i dir sa moratwar in permet IEA pour refer son rezis later, etabli konbyen larzan i sipoze pe kolekte me ki pa ti pe ganny kolekte e atraver sa legzersis Minis Vidot i dir zot in kapab kolekte en sonm 22 milyon roupi e 10 milyon ladan ti konpri aryeraz.

“Sa letan in osi ed nou pour kapab esey etabli en rikord bann dimoun ki’n kapab transfer later, sirkonstans sa bann transfer e sonm ki’n peye pour sa bann transfer. E osi dapre fason serten dokimantasyon ti ganny fer, i annan deka kot ni stamp duty pa ti ganny peye lo sa bann transfer e sa i enn parmi bann rezon akoz ki tou resaman konsey minis in aprouv en peyman 12.5% lo bann transfer e sa linisyativ pour permet gouvernman anmas enpe larzan,” Minis Vidot in dir.

I’n osi fer resorti ki bann later endistriyel i bann later sibvansyonnen par gouvernman e sa larzan i ava ede pour siport enpe bann proze e demann pour bidze pour devlop bann proze lenfrastriktir, fer travay mentenans dan zòn endistriyel osi byen ki met dan en fon pour servi pour reenvestir dan bann konblaz dan lefitir si posib.

“Apre louvraz entansiv ki’n ganny fer, ozordi i annan bokou plis lord dan fason keksoz pe ganny zere, nou’n entrodwir bann nouvo prosedir e kriter ase strikt ki gouvern demann pour transfer later. Par egzanp, ozordi personn pou napa drwa fer transfer en later si sa later pa ankor devlope,” Minis Vidot in dir.

An sa ki konsern sa bann mezir, Minis Vidot i dir zot annan pour bi fer keksoz vin pli ekitab e donn loportinite lezot dimoun ki pa ankor ganny sans pour fer zot biznes.

Dan en kestyon siplemanter Onorab Henrie ti anvi konnen kote manm piblik e okenn endividi ki enterese i kapab ale pour ganny akse avek lenformasyon lo tou sa bann later ki tonb dan zòn endistriyel.

Minis i dir ki IEA pe fer en travay konpreansiv avek Rezistrar Zeneral e kot sa biro e osi biro later i sipoze annan rikord tou sa bann later.

I dir kot IEA i annan en lalis tou sa bann later me pour asire ki tou sa bann lenformasyon lo zot i korek e konplet i form parti sa legzersis ki ankor pe ganny fer an kolaborasyon avek biro Rezistrar Zeneral.

Atraver en lot kestyon Onorab Henrie ti anvi minis i presize lo konbyen zil ki annan zòn endistriyel. Lo sa size Minis Vidot in dir ki Zil Ev lo Praslin i osi en lot landrwa kot i annan later endistriyel.

Antretan Minis Vidot in dir ki legzersis pour met tou bann rikord konsernan sa bann later annord e resers pour bann aryeraz i ankor pe kontinyen e bann dokiman pe montre ki i ankor annan 19 milyon an aryeraz.

Me minis in dir ki zot pe fer sir ki tou dimoun ki annan later pe ganny zot bann invoice azour e byento tou sa bann lenformasyon pou ganny stoke dan en fason nimerik.

Minis Vidot in osi enform bann manm Lasanble ki zot in dekouver ki i annan endividi ki annan ziska 10 morso later endistriyel e zot annan lagreman pour sa bann later e napa gran keksoz ki gouvernman i kapab fer pour repran sa bann later.  

Marie-Anne Lepathy