Dan Lasanble Nasyonal |25 May 2022
Retret travay ki Prezidan ek Konsey Minis in fer Cap Lazare pa travayer Seselwa ki’n peye
Sa retret ki Prezidan Wavel Ramkalawan ek son Konsey Minis ti fer Cap Lazare le 18 Me semenn pase pa’n kout travayer Seselwa en sou akoz bann manm Konsey Minis in kontribye pour pey lokasyon ek manze pour sa zournen travay san menm tous en sou dan bidze ki’n rezerve pour sa.
Vis-Prezidan Ahmed Afif ti donn sa lenformasyon Lasanble letan i ti pe reponn en kestyon notis prive lo sa size par dirizan lopozisyon Sebastien Pillay. Onorab Pillay ti’n demann Vis-Prezidan Afif en leksplikasyon akoz ki Prezidan ek son Konsey Minis in al fer en retret Cap Lazare e konbyen in kout Seselwa ki pey taks.
Vis-Prezidan Ahmed Afif in enform Lasanble ki Prezidan Wavel Ramkalawan ek son Konsey Minis i annan drwa fer nenport miting ou rankont an koneksyon avek zot travay san bezwen demann permisyon avek dirizan lopozisyon.
Vis-Prezidan Afif in osi konfirmen ki Prezidan Ramkalawan ek son Konsey Minis ti fer en rankont ki ti relye avek zot travay Cap Lazare le 18 Me. I dir sa rankont ti konmans 7er bomaten e termin anviron 7er diswar.
“Sa zour ti’n met dekote pour adres bann size parey ki mannyer pour anmenn plis lefikasite dan travay, ki mannyer pour adres plizyer size ki pe preokip gouvernman e pep Seselwa tel parey pri lavi, bann kou aleksteryer ki pe kontinyelman monte e ki mannyer legzekitiv i kontinyen entansifye son zefor pour sirmont bann difikilte ki nou pei an zeneral pe fer fas avek sirtou kot i konsern bann menas eksteryer.
Lo son kote Vis-Prezidan Afif i dir li i pa ti dan sa rankont akoz i ti dan Lasanble Nasyonal pour prezant e defann prozedlwa ki ti pe amand lalwa antikoripsyon ki’n deza fini vin anfors menm si lopozisyon pa’n siport gouvernman dan sa demars.
“Nou panse ki ler nou zwenn dan en latmosfer diferan, en latmosfer travay mwen formel e kot nou pli pre ek kanmarad sa i anmenn en pli gran lanmitye ant bann minis. I anmenn en meyer konprenezon dan nou fason travay e solisyon pour nou pep ki ekspekte bokou de nou. Sanmenm ki an Angle i apel ‘team building’,” Vis-Prezidan Afif in fer resorti.
I dir ki sa fason zwenn konman en lekip dan en lanvironnman diferan i pa nouvo pour nou tou ki konpran sa laspe imen dan ladministrasyon. I ti azoute ki san en lekip ki travay ansanm nou pa pou reisi delivre alaoter ki sa pep i ekspekte de nou.
Vis-Prezidan Afif in fer rapel Lasanble ki aktyelman Commonwwealth of Learning, ki regroup bann Minis Ledikasyon dan Commonwealth, pe fer en retret isi kot lotel Savoy e par koensidans Merkredi le 18, bann sef ek zofisye sinyor bann lazans Nasyon Zini United Nations Country Team(UNCT) ki kouver Sesel ek Moris ti zwenn isi pour en retret trwa zour kot lotel Allamanda pour zisteman rod fason pour ranforsi bann partenarya e trouv bann nouvo loportinite pour travay ansanm. Lasanble Nasyonal osi ti organiz son rankont travay Cap Lazare le 4 Mars sa lannen.
“Mon felisit zot pour organiz sa retret akoz i en lot fason travay ansanm e personn pa’n kestyonn zot akoz i normal pour tou lorganizasyon rod fason pour kapab zwenn detanzaot pour trouv meyer fason pour travay ansanm.”
Swivan en kestyon si i annan en eleman ensekirite ki fer ki Konsey Minis i bezwen santi li neseser pour al fer miting Konsey Minis andeor State House, Vis-Prezidan Afif in dir ki zanmen Konsey Minis sa nouvo ladministrasyon in deza santi li mank sekirite me okontrer avek tou sa bann devlopman ki pe pase e bann revi pozitiv lo Sesel pandan sa 18 mwan ki sa gouvernman i o pouvwar, Sesel in bouz en kantite devan.
“Ozordi pour nou laliberte lapres nou premye dan larezyon e dan Lafrik, lo lager kont koripsyon nou premye dan Lafrik e menm pli o ki serten pei dan Lerop, IMF in donn nou en bon revi lo lekonomi malgre ki i ankor annan en kantite problenm dan lemonn e dan Sesel me selman, etan donnen sirkonstans ki nou ladan, sa revi ki nou’n gannyen nou satisfe ki nou pe fer en bon travay. Sa i akoz nou lekonomi pe remonte avek en growth ki pli for dan larezyon e nou santi nou rekonforte akoz exchange rate ozordi ki anba zot ladministrasyon ti 22 roupi pour en dolar ozordi i ant 14.50 e 15 roupi e sa i fer nou satisfe nou pe fer en bon travay e nou pa santi nou insecure me nou santi ki nou devret al pli lwen akoz i annan ankor bokou travay pour fer,” Vis-Prezidan Afif in dir.
Marie-Anne Lepathy