En Namibyen i kondann 5-an prizon pour lofans enportasyon drog kontrole |23 June 2022

Lakour Siprenm in sa semenn, Lendi le 20 Zen 2022, kondann Petrus Johannes Vermuelen, en zonm Namibyen aze 31-an, en term 5-an prizon.

Sa ti apre ki Vermuelen ti pled koupab pour sarz kont li, pour lofans konplo pour enport en drog kontrole (694 granm drog kokain).

Peryod letan ki Vermuelen in pase lo rimann pou ganny tire lo son term prizon.

Vermuelen ti ariv Erport Enternasyonal Sesel avek sa drog ki ti’n kasyet dan son bagaz, le 26 Oktob 2021, sorti orizinalman Namibya, an pasan par Sid Afrik ek Adis Ababa, Letyopi, lo en vol Ethiopian Airline.

I ti apre ganny entersepte par zofisye Biro Anti-Narkotik (ANB) dan Lafors Lapolis Sesel avek lentervansyon zofisye imigrasyon ek ladwann.

Kominike sorti kot Biro Anti-Narkotik