Kominike lapolis |23 June 2022
Sispe dan lanmor Romentha Wadugodapitiya i pas ankour
Sa zonm aze 33-an sorti Mont Buxton ki ti’n ganny arete Mardi konman sispe dan lanmor Romentha Wadugodapitiya ne Estico, in pas devan Lakour Siprenm yer bomaten kot ziz in ordonnen ki i ganny rimann pour 14 zour ziska le 5 Zilyet, zour ki i ekspekte ganny reanmenn ankour.
Antretan lapolis i kontinyen avek zot lanket dan sa enn ka.
****
En garson ek en zonm i ganny arete e detenir pour kiltivasyon kanabis
En garson 15-an ek en zonm 28-an, tou le de sorti dan distrik Anse Aux Pins, in ganny arete e pe ganny detenir.
Swivan en loperasyon konzwent par en tim patrol spesyal dan lapolis fer yer apremidi dan rezyon Anse Aux Pins, sa 2 sispe ti ganny arete sirplas dan en bwa kot lapolis in fer lasezi anviron 381 pye kanabis. Lapolis ti annan soupsyon ki sa 2 sispe ti pe fer kiltivasyon drog.
Lapolis in konmans en lanket dan sa ka.
Kominike sorti kot departman lapolis