Kominike Lapolis |16 August 2022
En zonm i perdi son lavi dan en lensidan lo lanmer
En zonm 45-an avek nasyonalite Sri Lanke in perdi son lavi dan en lensidan trazik lo lanmer pandan wikenn.
Lapolis ti ganny alerte lo sa lensidan ver 12:30 Sanmdi apremidi e dapre lenformasyon preliminer ki lapolis in ranmanse, sa bato dan ki sa zonm ti ete ti’n kit por lapes Providence Sanmdi bomaten avek sis manm lekipaz abor e en kaptenn. Sa bann lekipaz ti pe al fer en tes apre ki zot ti’n detekte en problenm teknik avek sa bato pour zot nobou rektifye e se a sa moman ki bato ti ganny tape avek laroul e divan for ki ti fer bato savire.
Sa 6 manm lekipaz abor ti ganny sans sove e fer mannev pour mont anler lo bato konman sipor me kaptenn pa ti reisi kapab sorti kot i ti’n prezimen pri dan bato.
Gard Lakot Sesel ansanm avek lezot zofisye militer, travayer SCAA e osi Lapolis Lamarin ti’n mont en loperasyon resers ek sekour ki ti al pour anviron 2 a 3 erdtan pour sekour sa bann manm lekipaz e retir lekor sa kaptenn kot i ti’n pri dan bato.
Tou le sis manm lekipaz ti ganny transporte kot baz gard lakot kot answit zot ti ganny transporte par labilans kot klinik English River pour swen medikal.
Sa zonm 45-an li i ti ganny sertifye mor ver 2er 45 apremidi par patolozis lapolis.
Lapolis in konmans en lanket dan sa lensidan trazik.
……………
En madanm etranze i ganny sove dan lanmer Takamaka
En madann viziter Alman aze 33-an ti ganny sove dan lanmer Ros Sodyer, Takamaka Sanmdi apremidi.
Lapolis ti ganny alerte lo sa lensidan ver 12:35 sa menm zour ki ti annan en viziter an detres dan lanmer Ros Sodyer, Takamaka e deswit lapolis ti reponn lapel pour asiste.
An arivan lo teren zofisye prezan ti ganny asiste ansanm avek en lot viziter etranze kot zot ti servi en ‘Life Ring’ pour fer tou mannev posib pour sov lavi sa viziter.
Ti ver 1er apremidi ki sa madanm ti reisi ganny retire dan delo sale e anmenn ater lo lans kot i ti answit ganny transporte par lanbilans kot Lopital Anse Royale pour swen medikal apre ki i ti’n resevwar blesir lo serten parti son lekor.
Lapolis i ankor enn fwa lans lapel avek tou manm piblik pour pran bokou plis zot responsabilite pour evit bann tel lensidan parey sirtou avek kondisyon lanmer ki tre move dan sa peryod letan.
Kominike sorti kot departman lapolis