Kominike Lapolis |11 October 2022
Lakour Siprenm i sezi en bato lapes Iranyen
Le 16 Septanm 2022 ziz Lakour Siprenm Mohan Burhan ti fer lord final dan en ka ki younit ki responsab pour fer lanket dan krim finansyel dan Lapolis Sesel (FCIU) ti anmenn devan son lakour an Zilyet 2020.
Sa younit ti raporte ki sa ka i konsern en bato lapes Iranyen (dhow) ki zot ti sezi an 2020 apre ki sa menm bato ti ganny servi pour transport drog kontrole tel konman 784.6 granm lopyonm e 97,945.1 granm eroin dan lanmer Sesel.
Sa younit i eksplike ki sa bann dimoun abor sa bato, en group Iranyen, ti ganny akite par Lakour Dapel Sesel lo en baz teknikalite. Swivan sa, FCIU ti anmenn en ka anba lalwa ‘Proceeds of Crime Civil Confiscation Act’ (POCCCA) pour sezi sa bato ki a sa letan ti vo ant 500 mil a 600 mil roupi Sesel.
Sa younit i eksplike ki swivan en batay legal vreman long, avek lasistans Biro Prokirer Zeneral, zot in reisi ganny lord final dan faver gouvernman e ki la sa bato i aprezan vin propriete leta.
Sa younit i rekonnet ki sa bann tel bato i mwayen pli komen ki pe ganny servi pour anmenn plizyer drog kontrole dan Sesel. Sa younit i fer resorti ki lapolis Sesel i pli determinen ki zanmen pour kontiny sa lalit kont drog kontrole dan Sesel.
****
En Brezilyen i ganny sarze pour lenportasyon 5 kilo kokain
En zonm Brezilyen aze 26-an ki ti ariv Sesel lo en vol Emirates sorti Dubai, bomaten le 24 Septanm 2022 e ganny entersepte par zofisye ladwann, imigrasyon ek lapolis, in formelman ganny sarze yer bomaten devan Lakour Siprenm pour lofans lenportasyon plis ki 5 kilo kokain (cocaine) ki en drog kontrole.
Sa akize pe reste lo rimann anba detansyon lapolis pour ankor 14 zour avan ki i repas ankor an kour.
****
Kaptenn ek lekipaz en bato lapes Iranyen i rimann pour 14 zour
Lapolis in raporte ki kaptenn abor en bato lapes (dhow) Iranyen ansanm avek 7 son manm lekipaz in ganny anmenn an kour yer bomaten kot zot in ganny rimann pour 14 zour antretan ki lanket kont zot i kontinyen.
Sa bato lo ki sa 8 sispe aze ant 20 a 42-an ti ete, ti ganny entersepte par bato lafors defans (gard lakot) dan lanmer Sesel le 7 Oktob kot abor serten kantite drog kontrole prezimen eroin ti ganny dekouver e sezi swivan sa loperasyon.
Sa bann sispe ti ganny remet dan lanmen lapolis le 8 Oktob apre ki zot ti’n ganny eskorte Mahé.
****
En zonm 65-an i admit lopital apre ki i pri dan son pick-up
En zonm aze 65-an e ki reste La Louise ki ti’n pri dan son ‘pick-up’ yer bomaten lo semen La louise apre ki en brans dibwa ti’n desire e tonm lo son transpor, in admit lo ward Lopital Sesel kot son kondisyon in ganny dekri konman stab.
Kominike sorti kot departman lapolis