2 akize dan lensidan seri laboutik kase Unity House lannen pase i kondannen |06 January 2023
Lapolis in raporte ki Jean Paul Ren Reginald aze 18-an ek Abraham Christ Matombe li osi aze 18-an in kondann prizon pour lofans kas batiman e vole.
Sa 2 zenn in sakenn ganny en term prizon ant 1 a 4-an pour sak dan sa 8 laboutik ki zot ti kase e vole ladan Unity House lannen pase.
Apre ki zot ti’n pled koupab, mazistra ki ti pe ekout sa zafer in konsider tou largiman prosekiter osi byen ki avoka ladefans e deside ki bann term prizon sa 2 akize i mars ansanm. Sa i vedir ki Reginald ek Matombe pou fer selman sakenn 4-an prizon e ladan letan ki zot in fer lo rimann pou ganny dedwir lo zot santans.
Touzour konsernan sa ka, en fiy aze 17-an ki li in pled koupab pour lofans resevwar propriyete vole, in ganny en santans 300 erdtan travay kominoter anba sipervizyon servis probasyon. Lezot kondisyon atase avek lord mazistra pour sa fiy i en progranm reabilitasyon ki i bezwen swiv.
Pour rezon medikal, en trwazyenm garson aze 17-an ki osi akize pour lofans kas batiman e vole pa ti kapab prezan an kour letan sa 3 lezot ti plede e i ekspekte fer sa le 11 sa mwan apre i ava ganny son kondannasyon.
Mazistra ti pas santans lo sa 3 zenn an Desanm 2022.
Kominike sorti kot departman lapolis