Vin riy anmor avek Joseph Sinon ek son bann zanmi dan spektak komedi ‘Gidigidi dan zansiv’ |02 February 2023

Apre detrwa lannen ki’n napa en bon spektak komedi kot dimoun in kapab riy zot vant plen, komedyen, akter e osi santer Joseph Sinon in vin avek en nouvo travay ki annan pour tit‘Gidigidi dan zansiv’ ki piblik pou kapab apresye sa Dimans le 5 Fevriye dan sant Konferans Enternasyonal apartir 3er apremidi.

Tiket pour sa spektak, ki pour tou lafanmir, in deza konmans vann yer e i kout 250 roupi e i anvant kot Darra’s Plus Lari Bazar, kot biro Tanmi e osi avek Joseph limenm si dimoun i kontakte li lo nimero telefonn 2712398.

Joseph i dir sa tit ‘Gidigidi dan zansiv’ “i koz pour limenm e i dir tousel” akoz ler nou riye nou zansiv i ganny gidigidi akoz i tranble e sanmenm ki’n fer li ganny sa lide pour vin avek sa tit.

Joseph i dir i ti konsevwar lide pour en tel spektak pandan mwan Desanm akoz i ti santi ki i annan en bonpe letan, 3-an, depi ler in annan en spektak komedi ki’n permet son bann fàn e piblik an zeneral riy zot vant plen e sa ti spektak Boulot Feray.

“Pour sa spektak i pa’n difisil pour mwan ganny akter, mon’n rod bann dimoun ki aktiv dan sa domenn, ki annan talan e ki fasil pour travay avek parey Richie B, Brady, Barabas, Najoie, Vincent Milius, Vincent Isaac…e deswit zot in aksepte e nou’n zwenn pour bann repetisyon,” Joseph i dir.

I’n fer resorti ki dan sa spektak pou osi annan serten one man show e osi bann sketch.

“Sa spektak anviron 2erdtan edmi i antyerman deroul otour bann fe e realite lavi toulezour e osi bann topik aktyalite Sesel e osi dan lemonn e i annan bokou leson pour tire ladan. Sa spektak pou en lokazyon pour bann dimoun oubliy enpe zot bann difikilte lavi e vin riy enpe pour detann e retir bann presyon ek stres,” Joseph i dir.

Nou ava rapel ki dan son parkour Joseph in met ansenn plizyer spektak komedi parey  Karikatir dan Lanatir, Dekalaz dan balizaz, Grimas dan laglas, parmi lezot ankor.

Marie-Anne Lepathy