Kominike Lapolis |05 December 2023
Trwa sispe i lo rimann pour alegasyon vol
Trwa zenn-onm in ganny arete an koneksyon avek en lesey pour vole dan rezyon Bel Ombre Dimans granmaten.
Enn i aze 18-an e i sorti Beau Vallon, dezyenm 19-an sorti La Gogue e trwazyenm i aze 22-an e i sorti Union Vale.
Sa trwa sispe ki ti lo en ‘scooter’, ti entersepte en transpor dan car park lekol primer Bel Ombre, sezi lakle sa transpor, fer lafouy ladan san konsantman son met e apre ale.
Lapolis ti ganny alerte lo sa lensidan ver 12.37 bomaten.
Tou le 3 sispe in yer bomaten pas devan Lakour Mazistra kot zot in ganny rimann pour 14 zour, antretan ki lanket i kontinyen.
*******
En touris i prezimen noye
En zonm 51-an sorti Slovakia ki ti lo vakans Sesel abor en catamaran in prezimen noye yer apremidi dan zanmerant zil Marianne, pa lwen avek La Digue.
Lapolis ti ganny alerte lo sa lensidan ver 3.35 apremidi e en lanket in konmanse dan sa ka, annatandan rezilta letopsi pour determin lakoz son lanmor.
Kominike sorti kot departman Lapolis