Fanmir Kreol i pas en bon moman Roche Caiman |28 October 2019
Dimans kreol borlanmer, en aktivite lo kalandriye Festival Kreol, i enn ki tou le lannen atir en gran lafoul ki desann pour vin eksperyans tou keksoz kreol tel ki manze, zwe tradisyonnel parmi lezot.
Sa lannen, pour premye fwa, en fun-day pour lafanmir in ganny organize Roche Caiman olye ki lo lans Au Cap e Beau Vallon. Parey labitid, ti annan en kwen pour manze lokal, menm si napa bokou vander ki ti pe vann manze tipikman kreol osi byen ki en poto lagres kot bann manrmay ti pe tant zot sans e teste zot lafors.
Ti osi annan en kwen zwe tradisyonnel tel ki danm latet ek plan kare e animasyon par plizyer benn enkli Saturn e benn Kas Makadanm ki ti pe perform bann morso kreol depi boner bomaten ziska tar apremidi.
En nonm dimoun ti’n desann an fanmir e ti pe profit loportinite pour manze, danse e anmize pandan ki bann zanfan ti zwe e fer lakours deryer kanmarad.
Sef egzekitif Lendistri Kreativ ek Lazans pour Levennman Nasyonal (CINEA) Galen Bresson ti dir tou-d-menm ki i satisfe avek nonm dimoun ki’n vin sa levennman menm si i ti ankouraz dimoun pour partisip plis, an dizan ki sa festival i en selebrasyon lidantite, kiltir ek tradisyon Seselwa ki fer Seselwa inik konman en pep.
«Ler nou regard an zeneral, nou pa war gran partisipasyon manm piblik. Lo kote zwe tradisyonnel osi nou pa pe war gran partisipasyon me nou pa konnen akoz dimoun pa le partisipe. Bann zwe i la. Lanbyans an zeneral, dimoun pe vini, pe danse, manze e zot pe pas zot letan trankilman anpe e nou ekspekte plis dimoun dan apremidi,» Msye Bresson ti dir.
I ti lans en lapel pour tou dimoun partisipe dan bann aktivite pour fer kreol fleri e anmenn sa levennman lo en pli gran lanpler.
An term lokasyon, Msye Bresson ti note ki sa lokasyon Roche Caiman i prezant plis loportinite pour aktivite deroul annord vi ki i annan ase landrwa pour kit transpor san koz konzesyon lo semen e ki i annan ase lespas pour diferan aktivite.
Msye Bresson ti osi dir ki 35enm Festival Kreol, ki pou ganny selebre an 2020, pou ofisyelman lanse byento pour donn komite plis letan pour organiz bann aktivite byen e pour en bidze pour sa levennman ganny kalkile boner.
Bann aktivite dan kad 34enm Festival Kreol i kontinyen pandan sa semenn ziska ki sa festival i fermen le 31 Oktob.
Nou portre i montre en pe lanbyans kot sa aktivite Roche Caiman.