Gro lapli i fer dega dan serten landrwa lo Mahé |04 March 2024
Sa gro ros ki ti deboule e kraz semen Mont Buxton
Par Patrick Joubert
Gro lapli ki ti konmans tonbe Vandredi apremidi e ki ti ale ziska granmaten Sanmdi, ti okazyonn dega dan senk distrik dan rezyon Santral ek Nor Mahé kot ti annan bokou rapor linondasyon, glisman teren, e delo ki ti antre dan serten lakaz dan bann sou rezyon.
Sa bann distrik ki ti ganny afeke an rezilta sa gro lapli ti enkli Anse Etoile, Mont Buxton, English River, Glacis, Beau Vallon ek St Louis kot bann lazans dirzans konsernen, dirize par Gouvernman Lokal ek Zafer Kominoter, ti lo teren pour donn lasistans neseser.
Distrik Anse Etoile in sibir plizyer glisman teren enpe partou sirtou toudilon semen kot travay pour retir later ek debri ti bezyen ganny fer pour deblok trafik. Semen ki konekte Zil Perseverans avek sa distrik ti osi inonde pandan lannwit kot Lapolis ti bezwen ferm semen son lannmen Sanmdi pour bann lazans kapab fer travay retir delo.
Sa landrwa kot i abrit bann lakaz dirzans ti osi inonde me akoz ki sa 18 lakaz in ganny konstrir lo en fondasyon ki o, delo pa ti antre anndan. Travay pour retir delo la ti osi ganny fer laba.
Dan distrik Mont Buxton, semen Karoutsou an montan ziska Dan Lenn ti konpletman fermen Sanmdi swivan en gro ros ki ti’n deboule e kraz semen. Ti osi annan plizyer lezot pti deboulir ros ek lateras ki ti'n grennen dan lezot landrwa dan sa distrik.
Lo kote distrik St Louis ek Beau Vallon, ti annan rapor deboulir ros e glisman teren sirtou lo semen kot trafik ti ganny afekte e motoris ti ganny dir pour servi semen alternativ.
Lotorite Transpor lo later ti osi fer sorti en lanons Sanmdi bomaten pour averti motoris pour evite servi semen Ile Aurore ki ti’n konpletman inonde.
Dapre Lotorite Meteolozi Sesel, sa lapli ki ti tonbe pandan sa pti peryod letan depi 5er apremidi ziska anviron minwi ti vreman entans kot 229 milimet lapli ti ganny rikorde Ma Constance e sa ti’n depas sa mwayenn lapli rikorde normalman dan mwan Mars ki 194 milimet.
Zot in fer remarke ki pei i ankor dan sezon lapli e ki lapli lo sa lentansite pou toultan fer dega.
Anfet gro lapli ti kontinyen yer Dimans e enteronp sirkilasyon. Yer ti annan landrwa kot sirkilasyon ti enteronple tel ki semen Sans Soucis dan rezyon santye Copolia, ki ti konpletman fermen apre ki en gro pye dibwa ti’n tonm atraver semen.
Portre : Kontribye
