Praslin ek La Digue osi i selebre Festival Kreol |28 October 2019

Praslin ek La Digue in osi organiz zot prop aktivite pandan wikenn pour komemor 34enm Festival Kreol.

Depi Vandredi bomaten ti annan lavant gro manze La Passe lo La Digue e sa ti kontinyen Sanmdi malgre lapli.

Vandredi swar pour premye fwa La Digue ti vwar en defile Fon Lanmal e sa ti deroul L’Union Estate kot plizyer stilis lokal ti demontre zot talan kreativ.

Fina Zialor, avek son koleksyon lenz apele ‘Lepok Grannter’, ti sorti meyer dan sa konpetisyon tandis ki Alexsina Serret ti ranport 2enm plas e Rachel Payet 3enm plas.

Ti osi annan partisipasyon en stilis sorti Trinidad e Tobago.

Yer apremidi lo La Digue ti annan en Dimans Kreol Borlanmer e sa ti osi deroul L’Union Estate.

Lo Praslin aktivite ti konmans avek lavant manze kot biro distrik Grand Anse Vandredi swivi par louvertir ofisyel festival ki ti fer lo Zil Eve aparti 6er diswar.

La plizyer artis Pralinwa ek ‘Island Youth Band’ ti pe egey lasware avek bann lanmizik tipikman kreol pandan ki lafoul ti kapab degiste bann pla e zi kreol ki ti anvant.

Sanmdi lapli ti retard en pti pe konmansman Laserenad, me plizyer endividi sirtou bann zanfan ek touris ti swiv e apresye sa defile ki ti pe deroul anba tenm ‘Fizyon Koko’.

Laserenad, ki ti ganny gide par lekol Praslin segonder, ti konmans St Joseph, pas kot erport e termin Amitié pour ankor en sware aktivite byen animen.

La kat letablisman ti pe partisipe e sa ti enkli lekol Grand Anse primer, Lotorite Laviasyon Sivil Sesel (SCAA), Fondasyon bann Zil (SIF) ek Lotel Raffles.

Manm organizater ti eksprim zot swe ki bokou plis letablisman ava partisipe lannen prosenn me toudfwa remersi bann ki ti’n reponn zot lapel pour zot zefor ek laganm.

Alafen laserenad, tou le kat letablisman ti resevwar en pri avek lekip SIF dan premye pozisyon swivi dan 2enm, 3enm ek 4enm plas par Lotel Raffles, SCAA ek lekol Grand Anse primer respektivman.

Aktivite ti terminen yer par en apremidi zwe tradisyonnel ek moutya, Grand Anse devan House 2000.

Nou prezant zot serten portre Laserenad lo Praslin tire par Romano Laurence.