Pyes teat ‘Pe Esper Godo’: En prodikyon byen kirye e enteresan |31 October 2019

Lasal Sant konferans Enternasyonal ti mardi swar akeir en pyes teat pa parey lezot entitile ‘Pe esper Godo’, ekri orizinalman par ekriven Irlande Samuel Beckett tar dan bann lannen 1940.

‘Pe esper Godo’ ti ganny anmenn a laporte bann spektater par Liniversite Sesel an kolaborasyon avek komite lorganizasyon 34enm Festival Kreol.

Annefe lasal ti byen ranpli avek bann fanatik teat.

Sa pyes in ganny tradwir an kreol Seselwa ensi ki adapte an konteks lokal par Marie-Thérèse Hossen et ganny met an senn par Christian Servina asiste par Aneesa Vel.

‘Pe Esper Godo’ i baze lo de vyeyar, Didi ek Gogo, ki pe esper en zonm ki apel Godo lo en semen, obor en pye dibwa.

Me Godo pa zanmen traverse.

Okour sa de zour ki zot esper Godo, Didi ek Gogo i argimante, fer bann dyok e fer bann diferan refleksyon.

Sa de zanmi i menm fer mazinasyon lo swisid a en moman.

Sa pyes, ki en trazedi-komedi, pa ti manke pour fer spektater riye partikilyerman letan karakter Pozzo ti antre lo lasenn avek son lesklav ki ti pe anmenn en taboure, valiz ek en sak vakwa.

Bann akter ki ti pe perfom dan sa pyes ti Roxy Athanase, Danny Volcy, Christian Servina, Lisette Servina ek Ismael Bibi.

I bon pour note ki sa pyes pou ganny montre pour en dezyenm fwa dan oditoryonm Liniversite Sesel, Anse Royale, Sanmdi le 2 Novanm.

Si ou’n mank premye, fer sir ki ou pa mank sa repetisyon.

Bann portre ki akonpanny lartik i montre enn de moman komik sa pyes.