Kominike Lapolis |03 May 2024
Lapolis i konmans lanket dan lanmor peser Stephane Etienne
Lapolis in konmans en lanket dan en lensidan bato ki ti raporte tar Merkredi swar, dan rezyon Anse Royale. Viktim sa lensidan i Stephane Etienne aze 40-an ki en peser sorti dan distrik Au Cap.
Dapre rapor inisyal, Etienne ti’n sorti lo en bato dan distrik Au Cap son apremidi pour vin Anse Royale. Ti ver 10er 05 diswar ki lapolis ti ganny alerte par en endividi ki i ti’n apersevwar en bato dan lanmer pe drive ver direksyon legliz e masin sa bato ti ankor aktiv, e ti napa personn abor.
De sivilyen ki ti’n osi temwanny sa lensidan ti deswit reazir pour al esey sekiriz sa bato, e zot pa ti apersevwar personn abor. Swivan sa Lapolis ti mont en loperasyon resers ek sekour depi aswar menm asiste par zofisye sorti dan diferan younit ki enkli Lapolis Lamarin, pilot pour ‘drone’ ek Gard Lakot Sesel.
Anvi kondisyon letan ki pa ti favorab, loperasyon resers aswar ti sispann e repran yer bomaten le 2 Me, avek led en group sivilyen abor en bato prive.
Dan ver 9er bomaten sa group abor sa bato sivilyen ti aperswar lekor sa zonm dan fon lanmer. I ti plitar ganny sertifye mor par patolozis lapolis. Antretan lapolis pe esper rapor letopsi pour determin lakoz son lanmor.
Kominike departman Lapolis