Kominike Lapolis |12 November 2019
Lapolis in raporte ki Steven Potter, en zonm 47-an ki reste Gazza Estate dan distrik Anse Aux Pins, in mor Vandredi swar apre ki en pick-up ti’n mont lo li dan semen Montagne Posée.
Sa lensidan fatal, ki ti ganny raporte ver 10:40, ti ariv letan sa pick-up ti pe al direksyon Anse Boileau sorti bor Anse Aux Pins.
Rezilta letopsi fer lo lekor Steven Potter in demontre ki se domaz entern dan rezyon son leren, la-ans ek ba vant ki’n koz son lanmor.
Drayver sa pick-up ki ti’n ganny arete e detenir ti azen o moman sa lensidan. Antretan in ganny large pandan ki lanket lapolis i kontinyen dan sa ka.
********
En drayver zonm ti perdi kontrol son loto e tap dan en miray Grand Anse Mahé Vandredi apremidi ver 2 :25. Erezman i pa’n ganny gran dimal.
Touzour Grand Anse enpe plitar, ver 4:40, ti annan en kolizyon ant en loto avek en pti bis kot 6 dimoun ti resevwar latansyon medikal apre ganny large.
********
Aksidan pli serye apre sa lanmor Vandredi swar ti ariv letan drayver en pti bis Toyota Hiace ti perdi kontrol son transpor e tap dan en pti dibwa Pti Barbarons Sanmdi granmaten. 8 dimoun in ganny dimal swivan sa aksidan. Ladan 6 in ganny trete e large tandis ki 2 lezot, en zonm ek en madanm, in ganny dimal serye dan lipye e zot admit lopital.
Sa enn aksidan ti ganny raporte arive ver 4er bomaten.
*******
En lot aksidan ti arive Sanmdi bomaten letan en jeep ek en pick-up ti fer kolizyon dan zanmerant UCPS Anse Des Genets. Swivan sa aksidan, 2 dimoun in ganny trete apre ganny large.
Lapolis in osi rikord lezot aksidan ki’n arive Vandredi lazournen e pandan lannwit me i pa’n bann ki’n serye.
Lapolis pe fer lanket dan tou sa bann ka.
Avek kondisyon letan lapli ki pe persiste, lapolis pe demann motoris konman pyeton pou pran bokou plis prekosyon letan zot lo larout piblik.