5enm edisyon pri literer Antoine Abel |28 November 2019
Marie Hoarau (portre a gos), gran venker dan kategori roman ek zistwar kourt ek Aneesa Vel, gannyan dan kategori poezi, pe resevwar zot pri avek Caroline Abel, enn bann fiy Antoine Abel (Portre : Thomas Meriton)
Antoine Abel, en non ki ankor rezonnen dan lemonn literatir
Antoine Abel, enn bann enkriven Seselwa pli prolifik, ti yer swar demontre ki son zistwar i enn ki san fen menm apre son lanmor atraver 5enm edisyon ‘Pri Antoine Abel’.
Sa konkour i onor sa ekriven pionye literatir Seselwa, ki ti desede 15-an pase an 2004, e ki’n kit deryer bokou travay tel konman ‘Zistwar ek zedmo Sesel’, ‘Mon tann en leokri’, ‘Restan kanmira’, ‘Coco Sec’, ‘Une tortue se rappelle’ e ‘Paille en Queue’.
Konkour Antoine Abel i en konkour nasyonal ki ti ganny relanse an 2007 pour promouvwar literatir kreol, ankouraz bann ekriven pour tranp plim dan lank e fer travay zot limazinasyon ensi byen ki ankouraz Seselwa pour lir literatir kreol.
Pour sa 5enm edisyon ‘Pri Antoine Abel’, ki ganny fer tou le 2-an, sete Marie Hoarau ki ti sorti konman gran venker dan kategori roman avek son travay ki annan pour tit ‘Rozina’, ensi byen ki dan kategori zistwar kourt avek ‘Dan en non’.
Ekriven, poet e serser dan langaz kreol, Aneesa Vel ti sorti meyer dan kategori poezi avek son rekey poenm entitile ‘Maniskri mon leker’.
Sa de gannyan ek lezot ki ti sorti dezyenm e trwazyenm ti resevwar zot pri pandan en sware spesyal ki ti’n organize yer swar kot restoran Sea Front par Lenstiti Kreol.
Dezyenm pri dan kategori poenm ti al pour Robert Mondon e trwazyenm pri pour Marie Clarisse, tandis ki dan kategori zistwar kourt sete Aneesa Vel ki ti reklanm dezyenm pozisyon swivi par Loura Barra dan trwazyenm plas.
Vi ki ti annan zis de travay ki ti ganny soumet dan kategori roman, dezyenm pri ti al ankor pour Robert Mondon.
Marie Hoarau, ki’n travay pour bokou lannen kot Lenstiti Kreol e menm oparavan asiz lo komite ziri konkour Antoine Abel, ti dir avek Seychelles NATION ki sa ti son premye fwa ki i partisip dan sa konkour, menm si i pe ekrir pour plis ki 30-an.
I ti eksplike ki son roman, ‘Rozina’, i deroul otour en zenn fiy ki vwar li an fas avek bann sitiasyon trazik e rakont konman i gradyelman sirmont sa bann lobstak.
«Alafen lekter pou vwar le byen ki venker lo le mal. Byensir, i annan bann lezot karakter ki antre ladan; nou pou vwar en pe bann fanmir rekonpoze e ki bann difikilte parfwa sa i anmennen[…] Mon’n osi esey fer lanmour, lanmor ek limour melanz ansanm pour fer en larmoni santiman,» Madanm Hoarau ti eksplike.
Son zistwar kourt, ‘Dan en non’, ki ti fer li ranport premye pri yer swar, i eksplor lavi de dimoun e lenpak ki zot non i annan lo direksyon zot lavi.
Lo son par, Aneesa Vel ti eksplike ki son rekey poenm ‘Maniskri mon leker’ ti ganny met ansanm an servan bann poenm ki i ti’n deza fini ekrir.
«Mon ti selekte bann poenm otour tenm lanmour me lo lot kote lanmour. Pa sa lanmour kot tou i zoli me kot i annan leker blese ek leker kase. I bann poenm ki fer lapenn e ki tris, e ki tret tenm lanmour dan son lot lapse,» Manmzel Vel ti dir.
Dan sa rekey, Manmzel Vel ti dir ki poenm ‘Semen pour ariv kot ou leker’ i sa enn ki pli profon e tousan pour li akoz i en refleksyon bann relasyon kot en dimoun pe eksprim son lekor, me son partener pa pe ekout li e pa pe retourn son santiman.
Travay serten sa bann ekriven ki’n ganny pri dan sa 5enm edisyon i ekspekte ganny met an piblikasyon par Lenstiti Kreol.
Ofet bann gannyan dan kategori poezi dan 4enm edisyon Pri Antoine Abel ti yer swar ganny sans pour siny zot bann travay ki’n fini ganny pibliye.
Dan son remark pour sa lokazyon, tyermenn bord Lenstiti Kreol, Anbasader Bernard Shamlaye, ti dir ki Lenstiti i ankouraz tou dimoun «pour ekrir, pour korize, pour reekrir ziska ki zot satisfe ki zot travay i kapab al pli lwen».
I ti osi prezant bann envite distenge, enkli de fiy Msye Abel, avek en nouvo edisyon rekey poenm ‘Paille en queue’ ki Msye Abel ti inisyalman pibliye an 1969.
Anbasader Shamlaye ti osi ofisyelman lans 6enm edisyon konkour Pri Antoine Abel pour 2020-2021.
Pli boner dan lazournen ti annan en konferans ki form parti omaz ki Lenstiti Kreol in oule rann Msye Abel alokazyon 85enm laniverser son nesans e 15enm laniverser son lanmor.
Elsie Pointe
Caption :
Marie Hoarau (portre a gos), gran venker dan kategori roman ek zistwar kourt ek Aneesa Vel, gannyan dan kategori poezi, pe resevwar zot pri avek Caroline Abel, enn bann fiy Antoine Abel (Portre : Thomas Meriton)
En ekriven, Reuben Lespoir, pe siny kopi son liv ki’n fek pibliye (Portre : Thomas Meriton)
Konferans ki ti deroul pli boner yer en loner Antoine Abel (Portre : Thomas Meriton)
