Trwa peser Au Cap i sov en touris Britanik dan lanmer |09 July 2025

Trwa peser Au Cap i sov en touris Britanik dan lanmer

Trwa peser Au Cap ti vitman mobilize Lendi apremidi pour sov lavi en zonm Britanik aze 71-an ki ti an detres dan lanmer.

Lapolis ti ganny alerte lo sa lensidan ver 3er apremidi pour lasistans. Dapre rapor inisyal ki lapolis ti resevwar, sa zonm ki ti lo vakans, ti pe fer windsurfing avek detrwa koleg o moman sa lensidan. Sa trwa peser ti reakte vitman, menm si kondisyon letan ti fer sa loperasyon sovtaz enpe difisil. 

Lo lapar Komisyoner Lapolis Msye Ted Barbe, lafors lapolis i oule senserman remersye sa trwa peser – Laurent Etienne, Paul Balette ek Ronny Balette – pour zot lasistans ensi ki lezot sivilyen ek zofisye lapolis ki ti’n osi reponn lapel pour lasistans. 

Teks ek portre : Departman Lapolis