Dife i detri en lakaz Dame Le Roi, Baie Lazare |19 July 2025
Dife ti yer apremidi detri en lakaz senk lasanm Dame Le Roi, Baie Lazare.
Dapre Lazans Servis Tenny Dife ek Sovtaz Anse Royale, se stasyon Victoria ki ti alert zot lo sa lensidan ver 2.23.
Dan en konversasyon par telefonn avek Seychelles NATION, zofisye ki ti pe diriz sa loperasyon, Andrew Renaud, ti dir ki zot ti deplway de kanmiyon ek sis zofisye. Ti pran zot en kenzenn minit pour ariv lo sit anpasan par Les Canelles.
«Ler nou ti arive sa lakaz ti anflanm e sa dife ti entans. Apre lobzervasyon nou ti konmans latak inisyal pour anpes li propaze e afekte bann lezot propriyete dan zalantour,» Msye Renaud ti dir. Lesey pour kontrol sa dife ti al omwen 45 minit, i ti dir.
«In pran nou en pe letan akoz nou ti bezwen kontrol en fwit gaz ki ti annan dan sa lakaz.»
Ti annan kat dimoun ki ti reste dan sa lakaz ki enkli trwa adilt ek en garson 13-an, me personn pa ti la o moman sa lensidan.
Patsy Canaya