Kominike Lapolis |08 August 2025
Lapolis i ankor pe rod Rodney Freminot
Lapolis pe ankor enn fwa demann Rodney Freminot aze 33-an sorti Anse Aux Pins, pour raport kot nenport stasyon lapolis pli pros imedyatman.
Lapolis pe osi lans en lapel avek nenport endividi ki konnen oubyen annan lenformasyon kredib lo kote Rodney Freminot i kapab ete pour kontakte kordgard plis pros imedyatman ou atraver sant komann lapolis lo 4288000, 999, 112 ou laliny anonim 133, e atraver bann platform lapolis lo rezo sosyal.
Lapolis pe rod Rodney Freminot an relasyon avek plizyer ka kas batiman e vole, ki zot pe fer lanket ladan.
Caption:
Rodney Freminot
*******
Jude Jean i kondannen pour vol
Lakour Mazistra, Ile Du Port in kondann Jude Jean aze 37-an sorti St Louis dan 2 ka vol.
Mazistra in kondann Jean 6-an prizon dan premye ka avek en lanmann 3 mil roupi, e dan dezyenm ka 4-an prizon avek en lanmann 2500 roupi, ki i pou bezwen peye avan le 30 Oktob 2025. Mazistra in ordonnen ki en sonm 3165 roupi i tire dan sa lanmann e al konman en konpansasyon pour sa 2 viktim.
Jean ti komet sa lofans le 12 Oktob 2024, kot i ti vol en telefonn dan en laboutik elektronik anvil, e menm zour vol 20 bwat sigaret dan en lot laboutik dan rezyon lavil menm.
*******
Lakour mazistran i sarz Patrick Sedgrick pour vol
Patrick Sedgrick aze 40-an sorti Union Vale, in formelman ganny sarze devan Lakour Mazistra, Ile Du Port, yer apremidi. Sa i dan en ka vol, e ganny larzan lo fo preteks.
Mazistra ki ti pe ekout sa ka in larg Sedgrick lo plizyer kondisyon swivan. Sa i ki i siny en ‘bail bond’ 10 mil roupi, dan sakenn sa bann ka, ki fer en total 20 mil roupi. I osi bezwen siny liv lakour dan kordgard Beau Vallon 3 fwa par semenn e pa komet ou ganny sarze pour okenn lofans parey pandan letan ki i deor lo laliberte provizwar.
Sedgrick ti komet sa lofans le 21 Zilyet 2025, kot i ti vol laptop e larzan en koup etranze ki ti lo vakans Sesel, e le 23 Zilyet 2025 kot i ti osi pran larzan lo fo preteks, touzour avek en viziter etranze ki ti lo vakans Sesel.
Lapolis in reisi rekiper serten propriyete ki ti’n ganny raporte vole dan sa bann ka.