Kominike Lapolis |25 November 2025

Kominike Lapolis

Alexandro Lesperance i kondannen pour vol

Alexandro Lesperance aze 38-an sorti Marie Jeanne Estate, Praslin in formelman ganny sarze devan Lakour Mazistra Praslin yer bomaten dan en ka vol, ki ti arive dan en farmasi Praslin menm pandan mwan Oktob 2025.

Apre ki lakour ti’n lir sarz kont Lesperance, i ti endike ki i pou defann son lekor li menm, e in pare pour li pled koupab pour sa lofans vol 14 lesans.

Pour vol, Lesperance in kondann 4-an prizon. Mazistra in enpoz en santans adisyonnel 5-an ek 6 mwan prizon pour lezot lofans ki enkli en lanmann ki i pa ti ankor peye, pour komet nouvo lofans pandan letan ki son santans ti lo sispann, e pour kas lord ek kondisyon ki Lakour Mazistra ti’n enpoz lo li oparavan. 

Sa i vedir santans i 9-an 6 mwan prizon. Me lakour in ordonnen ki son santans i mars ansanm, ki vedir i pou fer 5-an 6 mwan prizon.

*******

Darius Marie i ganny sarze pour de lofans

Darius Marie aze 25-an sorti Côte d'Or Praslin in formelman ganny sarze devan Lakour Mazistra Praslin yer bomaten. Sa i pour lofans akt endesan ek trespas kriminel. Marie ti komet sa lofans le 23 Novanm 2025, dan rezyon Côte d'Or.

Lapolis ti enform lakour ki Marie ti’n resaman ganny large an Septanm 2025, lo en santans ki ti’n ganny sispann pour menm kalite lofans, kot i pa ti sipoze komet okenn lofans pandan sa peryod letan. Sa i vedir in kas lord ek kondisyon ki lakour ti’n enpoz lo li. 

Mazistra in rimann Marie prizon Montagne Posée.

*******

Nathan Michel i ganny sarze pour de lofans

Nathan Michel aze 19-an sorti Belle Vue, La Digue in formelman ganny sarze devan Lakour Mazistra Ile Du Port, Mahé dan 2 ka. Sa i pour lofans rantre dan en lakaz avek lentansyon pour esey vole.

Michel pe rimann prizon Montagne Posée apre ki i pa’n kapab onor bann kondisyon ki Lakour Mazistra ti’n enpoze. Sa i enkli pey en kosyon 8 mil roupi pour son laliberte provizwar.