Mesaz Sosyete Lakrwa Rouz Sesel alokazyon Lazournen Enternasyonal Servis Volonter |05 December 2025
‘Tou kontribisyon i ganny valorize’
“Ozordi nou onor dedikasyon, dezir entern pour ed lezot ek limanite ki ganny manifeste par bann volonter atraver lemonn. Letan nou selebre sa zour nou osi annan en panse spesyal pour tou bann volonter ki pandan bann dernyen lannen in perdi zot lavi oubyen in sibir dimal grav pandan zot langazman dan servis volonter dan bann lanvironnman ostil oubyen dan bann landrwa dezas.
“Sosyete Lakrwa Rouz Sesel i ganny gide par set prensip – Limanite, Enparsyalite, Netralite, Lendepandans, Servis Volonter, Linite ek Liniversalite. Alor bann volonter i o-sant dan tou linisyativ ki annan pour bi anmenn lespwar, soulazman e gradyelman ed en dimoun fer en sourir ankor.
“Tenm ‘Sak kontribisyon i enportan’, anba ki Nasyon Ini i inifye nou dan selebrasyon Lazournen Enternasyonal Volonter 2025, i tre pertinan. I envit tou dimoun pour reflesir lo nou kontribisyon volonter pour ed en dimoun, en vwazen, en kominote, nou pei ler en nesesite pour en koudmen i aparan. Ou pa oblize fer gro kontribisyon, ou pa bezwen dedye long erdtan, ou pa bezwen sakrifye bokou; nenport kwa ki ou kapab donnen i ganny valorize e sirman fer en diferans dan lavi bann ki pe resevwar sa lasistans.
“Se alor sa ki bann volonter Sosyete Lakrwa Rouz Sesel in angaze pour fer. An pasan par larepons lapel dezas, servis premye swen ek sipor psikososyal; bann aksyon antisipasyon klima, langazman lazenes ek sipor zesyon, bann volonter Lakrwa Rouz in aktiv e vizib dan travay volontarya. Zot fer li avek profesyonalizm ek lafyerte.
“Sosyete Lakrwa Rouz Sesel i alors eksprim son lapresiasyon anver tou son bann volonter osi byen ki bann volonter sorti dan lezot lorganizasyon ki pe fer tou sa ki zot kapab pour kontribye anver fasonn bann meyer kominote e en lavenir pli briyan pour Sesel.
“Lenpak zot travay volonter i al bokou pli lwen ki zot bann aksyon imedya e i sirman kree en lefe pli larz ki tous plizyer lavi e inevitabman enspir plis sanzman.
“En GRO mersi e laplodisman pour tou bann volonter!”