Kominike Lapolis |12 December 2025
Portre: Departman Lapolis
En zonm 65-an i mor dan aksidan larout Praslin
Lapolis in rikord 13enm ka aksidan fatal pour sa lannen. Viktim i en zonm 65-an ki ti enplike dan en aksidan Merkredi swar dan rezyon Amitie, Praslin.
Sa zonm ti’n admit lopital Baie Ste Anne e son kondisyon ti deteryore pandan lannwit. I ti pe ganny prepare pour transfer Mahé pour swen medikal pli spesyalize, me malerezman in mor avan son transfer.
Dapre rapor inisyal ki lapolis ti’n ranmase, sa transpor ti pe fer direksyon Grand Anse Praslin letan i ti tap dan en miray obor semen. Lapolis ti ganny alerte lo sa aksidan ver 7er 40 diswar, pour lasistans.
Antretan en lanket in konmanse dan sa ka.