Kominike Lapolis |23 April 2026
Kominike Lapolis
3 dimoun i ganny sarze pour posesyon propriyete vole
Franky Marcus Mambe, aze 39-an, Leeroy Leon aze 39-an, ek Shahina Fanny aze 33-an, tou le trwa sorti Le Niole, in formelman ganny sarze devan Lakour Mazistra Ile Du Port an relasyon avek en ka pour an posesyon propriyete ilegal. Sa i konsern plizyer keksoz, enkli bann bizou, ki lapolis ti annan soupsyon ti’n ganny vole.
Mazistra in larg sa trwa akize lo bann kondisyon swivan; sakenn pou bezwen pey en kosyon 3 mil roupi pour zot laliberte provizwar; prodwi de dimoun koman garanti dan zot ka; en restriksyon lo mouvman depi 7er diswar ziska 5er bomaten; siny liv lakour dan kordgard Beau Vallon de fwa par semenn; pa enterfer avek okenn temwen dan sa ka; e pa komet okenn lofans pandan letan ki zot lo laliberte provizwar.
Franky Mambe i sel endividi ki’n kapab akord demann Lakour pour pey sa kosyon, e in ganny large. I pou bezwen respekte tou bann kondisyon ki Lakour in enpoz lo li.
Pour sa de lezot akize, Leeroy Leon ek Shahina Fanny, zot pa’n reisi akord demann Lakour e zot in ganny rimann Prizon Montagne Posée ziska ki zot kapab pey zot kosyon.
En zonm i ganny sarze pour menas an servan vyolans ek vole
Ryan Joseph, aze 25-an, sorti Le Niole, in formelman ganny sarze devan Lakour Mazistra Ile Du Port an relasyon avek de ka: menas an servan vyolans ek vole. Sa lensidan ti arive kot son rezidans Le Niole e ti ganny raporte avek lapolis ant le 28 Zanvye ek le 9 Mars 2026.
Mazistra in larg Joseph lo menm kondisyon dan tou le de ka. I pou bezwen pey en kosyon 10 mil roupi an total pour son laliberte provizwar, siny liv Lakour dan kordgard Beau Vallon de fwa par semenn, e pa enterfer avek okenn temwen dan sa bann ka. Vi ki Joseph pa’n reisi akord demann Lakour pour pey sa kosyon, in ganny rimann Prizon Montagne Posée. Si i reisi pey sa kosyon, i pou ganny large e i pou bezwen respekte tou bann kondisyon ki Lakour in enpoz lo li.
En zonm i ganny sarze pour 3 ka vole
Damien Hoareau, aze 33-an, sorti Glacis, in formelman ganny sarze devan Lakour Mazistra Ile Du Port an relasyon avek trwa ka vole ki ti ganny raporte avek lapolis. Sa bann ka ti arive ant le 21 Mars ek le 13 Avril 2026.
Mazistra in larg Hoareau lo plizyer kondisyon. Parmi, i pou bezwen siny en bail bond 6 mil roupi pour tou le trwa ka e i pa pou annan drwa enterfer avek bann viktim dan sa bann ka. I’n osi ganny ordonnen pour pa komet okenn lofans similer pandan ki i deor lo laliberte provizwar.