Kominike Lapolis |28 March 2020
‘Respekte regilasyon kont COVID-19’
Lafors Lapolis Sesel pe averti e enform piblik anzeneral ki an relasyon avek S.I 42 2020, Public Health (Infectious Disease) (Amendment) Regulation, 2020 aksyon pou ganny pran kont nenport ki endividi ki pa respekte bann nouvo lord e regilasyon kont viris COVID-19 ki’n vin anfors depi Lendi 23 Mars 2020.
Manm piblik napa drwa regroupe plis ki 10 dimoun dan landrwa piblik kiswa deor oubyen anfermen. Lapolis i ensiste ki manm piblik i bezwen respekte sa bann lord pour evite ki bann aksyon neseser i ganny pran pour mentenir lord ek lape, e osi ranforsi sa S.I kont zot.
Lafors Lapolis Sesel pe demann manm piblik zot korperasyon dan sa moman difisil.
Lapolis in osi depi Dimans le 22 Mars 2020, konmans met zofisye lo semen pour ede kot bann landrwa piblik parey kot bann lenstisyon banker, lasose, Ste Anne Jetty, karpark piblik tel ki IDC, karpark stadium, laboutik, e pour ede avek ‘social distancing’ ki vreman enportan. Manm piblik i ganny demande pour respekte sa laspe social distancing pour evit kontaminasyon ou transmisyon sa viris.
********
‘Annou pa senm laterer parmi lapopilasyon’
Lapolis in raporte ki Minister Lasante in averti zot konsernan bann labi ki pe arive avek zot laliny 141. Sa i kot dimoun pe telefonn lezot dimoun e fer krwar ki zot en travayer Minister Lasante e pe enform dimoun ki zot pe vin desenfekte zot lakaz oumenm pe zis telefonn sa laliny pour nanryen ditou. Sa i en lofans e lapolis pou pran aksyon neseser si sa bann aksyon i kontinyen. Sa pou osi leka kot dimoun ki pe servi template Minister Lasante pour pibliy ou sirkil bann fo lenformasyon lo rezo sosyal.
Lapolis pe profit lokazyon pour enform manm piblik ki sa viris i serye e nou pa merit pe servi sa moman pour senm laterer parmi lezot manm piblik.