Zofisye FCIU, ANB ek CID i aret 6 zonm dan en loperasyon konzwent |13 July 2021
Lapolis in raporte ki 6 zonm sispe in ganny arete e anmenn ankour yer, Lendi le 12 Zilyet, kot zot in ganny rimann ziska le 23 Zilyet pour plizyer lofans tel ki konplo pour blansi larzan, konplo pour fer trafik imen, konplote pour enporte e fer trafik drog kontrole ek lezot lofans anba lalwa kont trafik imen, drog kontrole ek blansisaz larzan.
Parmi sa bann sispe i annan 2 ki pa dan lanplwa, 1 mekanik, 1 ki travay avek en lakonpannyen lo por ek 2 drayver taksi. Parmi sa 6 sispe i annan ki reste Ma Joie, Pointe Larue, Pointe Au Sel, Anse Aux Pins e Beau Vallon.
Tou le 6 sispe ti ganny arete swivan loperasyon konzwent ant zofisye FCIU, ANB ek CID pandan wikenn.
Lanket dan zot ka i kontinyen.
Lekor en pti baba ki ti’n fini formen in ganny ranmase dan en dustbin Beau Bel
Lapolis in egalman raporte ki zot in konmans lanket dan ka kot lekor en pti baba ki ti’n fini formen in ganny ranmase dan en dustbin Beau Bel yer.
Dapre patolozis ki’n al dan sa landrwa, sa pti baba ki en pti garson i kapab annan 9 mwan.
Sete en garson ki ti pe ranmas boutey PET ki ti fer sa dekouvert ki lapolis ti ganny enformen lo la ver 1er12 apremidi.
Antretan ki lanket pe fer dan sa ka, lapolis pe demann nenport endividi ki annan lenformasyon kredib lo sa lensidan pour kontakte kordgard Beau Vallon oubyen CID.
Kominike lapolis