Kominike Lapolis |01 September 2025
Kominike Lapolis
En zonm 26-an sorti Bougainville dan distrik Anse Royale in resevwar tretman Lopital Sesel apre plitar ganny large lo tar apremidi. Sa i anrezilta en aksidan ki’n arive lo highway yer granmaten.
Dapre rapor inisyal ki lapolis in ranmase, sa rider ti pe fer direksyon Pointe Larue o moman sa aksidan, kot i ti tonbe lo son scooter.
Lapolis ti ganny alerte lo sa aksidan ver 4er 25 yer bomaten pour lasistans.
*******
En zonm Seselwa ti reisi sov lavi en viziter etranze, en madanm 40-an avek nasyonalite Ikrenyen, dan lanmer Grand Anse, La Digue yer apremidi.
Dapre rapor inisyal ki lapolis in ranmase sa viziter ti pe pran en benn mer ler kouran ti trenn li andeor. I’n ganny transporte kot sant lasante St Mary's pour swen medikal.
*******
En zonm 32-an sorti Rochon in admit Lopital Sesel yer granmaten anrezilta en aksidan ki’n arive Roche Caiman dan zanmerant sa biznes lav loto (car wash).
Dapre rapor inisyal ki lapolis in ranmase, sa rider ti pe fer direksyon Providence o moman sa aksidan, kot en transpor ti tap li. Lapolis ti ganny alerte lo sa aksidan ver 6er yer bomaten pour lasistans.
*******
Swivan en aksidan yer granmaten lo Lari Royal, en zonm 43-an sorti Perseverance in resevwar tretman Lopital Sesel e apre ganny large.
Dapre rapor inisyal ki lapolis in ranmase sa pyeton ti pe travers semen ler en transpor ki ti pe fer direksyon lavil ti tap li.
Lapolis ti ganny alerte lo sa aksidan ver 5er 40 yer bomaten pour lasistans.
En lanket in konmanse dan sa ka.
*******
Lapolis in konmans en lanket detaye pandan letan ki zot pe esper rezilta letopsi pour etabli sirkonstans otour lanmor en zonm 50-an sorti La Passe, La Digue, ki’n arive Sanmdi bomaten kot son rezidans.
Dapre rapor inisyal ki lapolis in ranmase sa defen, ti’n ganny vwar par en manm son fanmir kot son lakour pa pe reazir. I ti plitar ganny sertifye mor sirplas par dokter.
Lapolis ti ganny alerte lo sa lensidan ver 10er 45 bomaten pour lasistans.
*******
En zonm 43-an sorti Talbo, Cascade in pas devan Lakour Mazistra Anse Royale, Vandredi apremidi kot in ganny rimann 7 zour andetansyon lapolis. Sa i pour lofans azir avek lentansyon pour koz dimal grav en endividi.
Sa sispe ti komet sa lofans Sanmdi bomaten, Petit Paris kot i ti fizikman agres en endividi.