Kominike Lapolis |12 November 2025
Jefferson Marie i lo rimann pour 14 zour
Lakour Mazistra, Ile Du Port in yer bomaten ordonnen ki kondannen Jefferson Marie i rimann 14 zour an detansyon lapolis. Marie, aze 32-an i sispe dan ka pour sove an detansyon servis prizon Sesel, vol an servan vyolans, kas lakaz e vole e trespas kriminel.
Marie ti’n sove an detansyon servis prizon le 30 Oktob 2025 e i ti ganny arete Lendi bomaten Anse Aux Pins.
******
Neddy Payet i kondannen dan kat ka
Neddy Payet in kondann pour kat ka devan Lakour Mazistra Anse Royale. Sa i pour lofans vole, andomaz propriyete e an posesyon en propriyete vole.
Dan premye ka Payet in kondann 2-an prizon, dan dezyenm ka en term 2-an prizon, en term 9 mwan prizon dan trwazyenm ka, e en term 1-an prizon dan katriyenm ka. Mazistra in ordonnen ki son term prizon i mars ansanm ki fer i pou fer selman 2-an prizon.
Payet ti komet sa bann lofans Anse à la Mouche le 21 Zen 2025 kot i ti vol en scooter, le 16 Me 2025 i ti vol sak en drayver taxi, le 14 Me 2025, i ti vol sak en koup etranze ki ti lo lans, e plitar lapolis ti aret li dan rezyon Anse Aux Pins e sezi dan son posesyon enn parmi sa telefonn ki ti’n ganny raporte vole dan enn sa ka.
Mazistra in ordonnen ki i osi pey en sonm 11 mil roupi konman konpansasyon pour bann viktim dan sa bann ka.
******
Brian Etheve i kondannen pour vol
Lakour Mazistra Ile Du Port in kondann Brian Etheve 2 term 7-an prizon pour lofans kas lakaz e vole.
Mazistra in ordonnen ki son term prizon i mars ansanm ki fer i pou fer selman 7-an prizon, e letan ki i’n fer lo rimann i ganny dedwir lo son santans. Etheve ti komet sa lofans le 4 Zanvye 2025 dan distrik Anse Royale.
*******
Mario Jean-Baptiste i kondannen pour vol
Lakour Mazistra Anse Royale in kondann Mario Jean-Baptiste pour en ka kas lakaz e vole.
Mazistra in kondann Jean-Baptiste 2-an prizon ki’n sispann pour en peryod 2-an, avek en lanmann 8 mil roupi ki i pou bezwen peye avan le 30 Zanvye 2026.
******
Skitter Albert i kondann sis mwan pour andomaz propriyete
Skitter Albert aze 58-an sorti Maldives in kondann 6 mwan prizon pour lofans andomaz propriyete. Mazistra in ordonnen ki son santans i sispann pour en peryod 2-an. I osi annan en lanmann R6,500 ki i pou bezwen peye. Ladan en sonm R6,100 roupi pou al konman en konpansasyon pour lapolis.
Albert ti komet sa lofans le 14 Novanm 2023, Maldives. Lapolis ti’n reponn lapel pour lasistans swivan serten konportman dezordonnen ki i ti pe fer. Apre son larestasyon i ti ganny mete dan transpor lapolis kot la Albert ti andomaz en vit sa transpor.