Swazir ou kado Nwel spesyal dan bazar ‘Lar dan Viktorya’ |18 December 2021
Dimoun ki anvi aste en kado pour ofer zot pros pour lafet Nwel zot kapab pas dan zarden Camion Hall anvil pour swazir parmi en koleksyon tablo lapentir, skilptir ek maket ki anvant dan en bazar apele ‘Lar dan Viktoya’.
Sa aktivite ki ti komans yer bomaten e pou kontinyen ozordi Sanmdi, i en linisyativ Konsey Nasyonal pour Lar (Nac) an kolaborasyon avek Lazans Lantrepriz Sesel (Esa). Son bi se pour donn bann artis lokal sa sans pour ekspoz e vann zot bann prodwi pour sa sezon festivite.
Parmi bann pent, skilpter, e bann ki fer maket ki ti prezan avek zot travay ti Colbert Nourice, Sabrina Payet, James Agricole, Barry Gertrude, Robert ek Patrick Alexis, Paul Gilbert e bann zanfan sorti kot lekol sourd, parmi lezot.
I fer premye fwa ki Nac ek Esa i kolabor ansanm pour fer en tel aktivite.
Manm piblik i ganny envite pour vin vwar e swazir parmi tou sa bann zoli travay lar e zoli kado Nwel ki zot kapab ofer zot pros ek zanmi.
Bann portre i montre serten parmi bann artis ek zot travay lar dan sa bazar.
Patrick Joubert
Portre par Dionne Renaud
