Kominike Lapolis |15 January 2022
En group lenstrikter sorti lakademi lapolis in fer en dekouvert 4 plantasyon kanabis dan en bwa dan rezyon Anse Royale Zedi bomaten pandan en ‘hike’ ki zot ti pe fer. En total 169 pye kanabis in ganny derasinen e sezi e lapolis in konmans en lanket dan sa enn ka.
*******
En zonm 27-an sorti ‘Dan Fatak’ dan distrik Baie Lazare in ganny anmenn ankour yer bomaten kot in ganny rimann pour 14 zour antretan ki lapolis i kontinyen avek lanket dan 2 ka vol ki’n arive lo lans Intendance tou dernyenman.
Premye ka ti ganny raporte avek lapolis le 11 Zanvye 2022 ver 5.40 apremidi e lot ka le 13 Zanvye ver 6.50 diswar.
Toulede ka ti ganny raporte kordgard Quatre Bornes dan distrik Takamaka.
Dan sa ka Zedi swar, mazorite lobze personnel ki ti’n ganny raporte vole in ganny rekipere sof larzan.
Sa sispe ti ganny arete Zedi swar menm par zofisye lapolis avek lasistans en sivilyen dan rezyon Intendance kot sa sispe ti fizikman agres sa zofisye pandan ki i ti pe reziste larestasyon.