US i kondann desizyon Spiker pour permet en manm Lasanble sansir son koleg |31 March 2022

United Seychelles in kondann san rezerv lensidan yer bomaten dan Lasanble Nasyonal kot Spiker, Msye Roger Mancienne, in donn permisyon Onorab Bernard Georges, dirizan zafer gouvernman, pour anmenn en mosyon pour sansir dirizan lopozisyon dan Lasanble, Onorab Sebastien Pillay.

United Seychelles (US) i oule fer rapel ki rol prensipal Msye Bernard Georges se pour promouvwar biznes gouvernman dan Lasanble.

US i panse ki se Msye Spiker ki devret deside kan en manm pe sot balizaz, e non pa en lot manm.

US i note ki en tel lensidan napa presedans dan listwar Lasanble Nasyonal nou pei, e ki i en afron pour nou zenn demokrasi.

Sa i montre klerman ki i annan en mank tolerans dan Lasanble Nasyonal pour lopinyon diverzans, osi byen ki en latitid totaliter.

US i demande alor ki pour posterite osi byen ki pour son repitasyon, Msye Spiker, Roger Mancienne, i ranvers sa desizyon, akoz san lademokrasi ek tolerans, nou pei pou glis dan dezord sivil.

Kominike sorti kot lider parti United Seychelles