Kominike lapolis |06 April 2022
Steve Esparon i kondann 15-an prizon pour labi seksyel
Lakour Siprenm in le 1 Avril kondann Steve Esparon, en zonm dan son 30enn lannen ki reste Anse Aux Pins, 15-an prizon pour lofans labi seksyel lo en fiy anba laz.
Letan Esparon ti komet sa lofans an 2019, sa fiy ti napa 15-an.
Rapor sa lensidan sa letan ti ganny fer avek lotorite servis sosyal e ka in ankete par lapolis.
*****
En ‘sky diver’ madanm etranze i ganny dimal serye dan ros lo La Digue
En viziter madanm Ameriken aze 33-an i admit lo ward Lopital Sesel swivan en lensidan enfortinen lo La Digue Lendi apremidi.
Ti ver 2er48 apremidi ki lapolis ti ganny enformen ki en ‘sky diver’ ti’n rann lapel dan ros dan zanmerant Grand Anse, La Digue e i ti’n resevwar dimal serye dan son lipye kote gos.
Sa madanm ti inisyalman ganny premye swen kot sant medikal Logan lo La Digue apre ganny transporte Mahé par elikopter pour resevwar swen pli spesyalize.
Son kondisyon in aprezan ganny dekri konman stab e lanket i an progre pour etablir sirkonstans otour en tel lensidan ki ti’n kapab trazik.
*****
En zonm aze i ganny dekouver mor dan lakaz seli Anse Aux Pins
Lapolis in egalman raporte ki en zonm 70-an ki normalman reste li tousel Chetty Flat, Anse Aux Pins in yer bomaten ganny dekouver mor dan lakaz.
Lapolis ti ganny enformen lo sa lensidan ver 8er03 bomaten. Sa dekouvert ti ariv apre ki en vwazen ki abitye organiz zarden sa msye ti’n trouv son bil PUC deor e ti’n ranmase pour donn li e sete swivan sa ki i ti vwar li asize pa pe ‘respond’ dan fotey dan salon.
En lanket in konmanse an atandan rezilta letopsi pour etabli lakoz e posibleman sirkonstans otour lanmor sa msye 70-an.
*****
Sa manager laboutik lo Praslin ki ti ganny arete le 18 Mars pour lofans vol i ganny sarze
Lakour Mazistra in Lendi le 4 Avril sarz sa manager laboutik ki ti ganny arete le 18 Mars pour lofans ‘stealing by servant’ e apre larg li lo serten kondisyon.
Parmi bann kondisyon ki sa akize in ganny large lo la i siny en kosyon 100,000 roupi, remet son paspor avek lakour, i pa ganny drwa kit pei san lotorizasyon lakour e osi siny liv lakour kot lapolis en fwa par semenn. Mansyon sa ka pou fer isi Mahé le 21 Avril e plitar ganny transfer Praslin pour ekoute e zizman.
*****
Michel Estrale i ankor manke
Resers ek lanket anmennen par lapolis pour retrouv Michel Estrale, sa zonm sorti Le Niole, raporte manke par son fanmiy depi Merkredi le 23 Mars, i ankor anven.
Ankor enn fwa lapolis pe lans lapel avek nenport endividi ki’n dernyen fwa trouv li oubyen ki annan lenformasyon kredib lo son disparisyon pour kontakte son sant komann oubyen CID.
Kominike sorti kot departman lapolis