Minis Joubert i donn leskplikasyon lo bann ‘bil’ elektrisite ki ti o pandan mwan Avril |11 May 2022
«PUC i rekonnet ki in annan serten retar dan son bann aktivite lir ‘meter’ (konter), dan mwan Avril, ki’n fer ki serten group konsomater in vwar en sanzman dan zot bil pour sa mwan.»
Sete Minis pour Lagrikiltir, Sanzman Klima e Lanvironnman, Flavien Joubert ki ti dir sa dan Lasanble Nasonal yerler i ti pe reponn en kestyon notis prive demande par dirizan lopozisyon Sebastien Pillay.
Msye Pillay ti anvi konnen ‘akoz ki bann ki bil PUC ti’n mont sitan bokou padan sa mwan ki’n pase’.
Lasanble Nasyonal ti repran son travay pour dezyenm trimes sa lannen yer apre trwa semenn repo e sa kestyon par Onorab Pillay ti premye size deba lo progranm.
Minis Joubert ti kontinyen an dizan ki normalman, Korporasyon Litilite Piblik i bil son bann konsomater lo en baz 30 zour an mwayenn. Me parkont i annan sirkonstans kot sa pa posib pour bil bann konsomater sirtou pandan mwan kot i annan bokou konze piblik(depandan lo ki zour i tonbe) e osi pandan gro lapli ek movetan ki persiste e anrezilta afekte prosesis lir bann ‘meter’ (konter).
«Dan bann tel sirkontans kot ‘meter’ i ganny lir plis ki 30 zourkonsomasyon, i fer ki sa ‘bil’ i enpe plis ki bann sarz labitid. En tel sitiasyon ti arive an Avril sa lannen kot ti annan trwa zour konze piblik dan lasemenn e ki mannyer konze Pak in tonbe, progrannm PUC pour lir ‘meter’ in an retar an mwayenn par kat a set zour,» Minis Joubert in eksplike.
In osi dir ki pour adres sa sitiasyon, PUC in rekalkil ‘bil’ bann kliyan ki’n vin devan e met zot sarz lo en baz 30 zour an mwayenn e pour bann lezot kliyan sirtou dan Perseverance, La Gogue e serten rezyon dan Beau Vallon, Glacis, Les Cannelles, Anse Boileau ek Takamakaki zot ‘bil’ in osi ganny lir tar, PUC pe adres zot ‘bil’ direkteman pour fer li vin lo sa baz 30 zour pour anpese ki zot pey sa pritarif ki pli eleve. Bann lezot zour anplis i ganny azoute lo sa lot 30 zour dan mwan ki swiv.
Minis ti osi eksplike ki Avril ti en mwan ki ti tre so kot in annan logmantasyon dan kosomasyon elektrisite an zenerale sa i relye aveksirtou litilizasyon ler klimatize (aircon) parmi bann konsomater. I ti fer remarke ki lenformasyon resevwar avek PUC ti montre ki sa logmantasyon in anviron 6 a10% me sa pa ti vedir en logmantasyon dan tarif elektrisite me plito en sanzman dan lakantite elektrisite ki ganny konsonmen dan pei.
I ti dir ki tarif elektrsite pa’n sanze an Avril sa lannen kot dernyen sanzman lo tarif ti le 1eZanvye 2022. La i ti annan en logmantasyon 13 sou dan tou kategori. I ti osi fer resorti ki dernyen fwa ki tarif delo ti sanze ti le 1e Septanm 2018.
Parmi bann ki ti demann kestyon, Onoran Sandy Arrisol sorti lo kote parti mazoriter Linyon Demokrtaik Seselwa (LDS), ti anvi konnen ki pe arive avek progranm konsesyon lo elektrisite ki governman ti sipoze met anplas atraver PUC pour ed serten fanmir vilnerab dan lasosyete. I ti osi demann minis ki travay ki PUC pe fer pour aviz bann konsomater lo bann kekoz ki zot kapab fer pou redwir zot kou elektrisite ek delo.
Pour son larepons, Minis Joubert ti dir ki ti annan plas pour pliski 500 lakour antre anba sa progranm me selman zis 300 ki lo sa skim. I ti azoute ki dapre Lazans Proteksyon Sosyal, ki annan rol pour idantifye sa bann lakour ki sipoze benefisye anba sa progranm lo Mahe,Praslin ek La Digue, bokou kliyan pa entrese pour aksepte sa konsesyon kot serten parmi ioule ki zot ganny sa larzan pour sa diferans anplis ki zot ti pou peye dan plas sa konsesyon.I ti fer remarke ki gouvernman pa pe donn larzan me plito ofer en rediksyon dan zot bil elektrisite. In demann bann ki ganny idantifye pour antre lo sa progranm pour fer li akoz zot pou benefisye avek en redisksyon anviron 300 roupi lo zot bil. I ti dir ki PUC in toultan donn konsey piblik lo meyer fason pour redwir zot konsomasyon elektrisite ek delo e sa pe kontinyen.
Swivan en kestyon par Onorab Conrad Gabriel sorti lo kote parti minoriter United Seychelles (US) lo ki PUC pe fer pour amelyor fason ki bann ‘meter’ pe ganny lir, Minis Joubert ti reponn ki PUC pe travay lo en sistenm ‘overtime’ pour bann ‘meter readers’ pour kouver plis lespase osi fer aporsyonnman konsomasyon 30 zour avan ki bil i ganny delivre. I ti osi deklare ki sa lakonpanyen pe aksepte ‘bil’ par ‘WhatsApp’ ek ‘email’ lo dat ki ‘meter’ i abitye ganny lir. I ti kontinyen an dizan ki sa i parmi bann sistenm ‘smart biling’ pour le fitir ki pou anpese perdi letan pour antre dan bann propriyete pou al lir ‘meter’. I ti fer remarke ki PUC i annan 50 ‘meter readers’ pour kouver 40,000 konsomater elektrisite e 35,000 konsonmater delo e PUC pe fer ki i annan en bon kouvertir. PUC i annan lentansyon pour azout 10 ‘meter readers’ pour ede annan plis kouvertir lespas.
Loter kestyon, Onorab Pillay ti demann minis si bann zour anplis lo en ‘bil’ i ganny kalkile lo sa pritarif o e apre ganny transfer lo sa lot ‘bil’30 zour pour lot mwan.
Minis Joubert ti dir ki sa pa leka akoz PUC pe fer zot ‘bil’ antre dan sa 30 zour ki fer ki zot tonb dan sa pri tarif ki pli ba.
Patrick Joubert