United Seychelles i deplor desizyon Lasanble Nasyonal pour amann lalwa Anti-Koripsyon |20 May 2022

United Seychelles i deplor desizyon pran par Lasanble Nasyonal dan son sitting le 18 Me, 2022, pour amann lalwa Anti-Koripsyon.

Parti United Seychelles in dir dan en kominike lapres yer ki malgre i siport tou zefor pour lit kont koripsyon, i santi ki sa i bezwen ganny fer anliny avek Konstitisyon e bann prensip legal ki egziste dan nou pei.

United Seychelles i note ki prosedir pour anmenn sa lalwa devan Lasanble Nasyonal in soulev plizyer kestyon lo abilite nou bann diferan lenstitisyon pour fer zot travay dan latransparans e san lenterferans.

United Seychelles i azoute ki plizyer konsern in ganny souleve lo konstitisyonnalite serten lamannman par plizyer group dan Sesel.

“I’n sokan pour tann dir ki sa lalwa pou annan serten lefe retrospektiv par Vis-Prezidan Ahmed Afif ler i ti prezant sa proze-d-lwa. En tel lamanman i san presedans dan listwar nou pei,” United Seychelles i dir dan son kominike.

“Sa i fer ki sa lamannman i al kont lespri nou Konstitisyon, pli spesifikman Lartik 19(4),” sa kominike i azoute.

United Seychelles i osi krwar ki gouvernman pa’n fer ase zefor pour ranforsi konpetans ACCS an relasyon avek bann pouvwar ki bann nouvo lamannman dan lalwa in donn li e ki serten lamannman ki ti ganny fer resaman an 2021 pour retir nivo kalifikasyon pour komisyonner ACCS in afekte kapasite sa komisyon.

United Seychelles i reste angaze pour lit kont koripsyon dan tou son laform e i pe lans en lapel avek Prezidan Larepiblik pour soumet sa lalwa ki Lasanble fek pase a en tes konstitisyonnel devan Lakour Konstitisyonnel avan ki i donn son laprouvasyon.

I swe United Seychelles ki tou lenstitisyon leta i kapab egzers zot manda dan lenparsyalite e latransparans e ki Sesel i ganny li bann lalwa ki for me osi ki respekte bann prensip ek lespri nou Konstitisyon.

Kominike sorti kot parti United Seychelles