Plis dimoun aze pe rod plas reste dan rezidans |20 July 2022

• Demars pe fer pour annan plis sa bann fasilite

I annan plis demann pour lakaz pour bann dimoun aze ki depas lakantite ki gouvernman i kapab fourni me departman lafanmir i servi tou loportinite ki i gannyen pour edik bann fanmir lo nesesite pour gard zot vye paran dan fanmir e pran swen avek zot apre ki zot in sonnyen e elve zot pandan en kantite lannen.

Me i osi annan plizyer demars ki pe ganny fer pour ankouraz sekter prive pour envestir dan bann fasilite ki pou gard e donn swen bann dimoun aze.

Sete minis responsab lafanmir Marie-Celine Zialor ek sekreter prensipal (PS) sa departman Clive Roucou ki ti donn sa bann detay ler zot ti pe reponn kestyon bann manm dan Lasanble Nasyonal yer bomaten.

MNA pour Plaisance, Richard Labrosse, ti anvi konn demars pour accommodate bann dimoun aze ki napa en sipor familyal ouswa en lakaz, e si i annan okenn nouvo polisi ouswa kriter ki’n met anplas ou pe al ganny met anplas pour asiste dimoun ki dan sa bann bezwen.

Dan menm laliny i ti osi anvi konnen si departman lafanmir pe revwar fason pour sansibiliz dimoun pour pran ka ek zot vye paran.

Minis Zialor ti fer resorti ki tenm pour departman lafanmir pour sa prosen 2-an i ‘Mon Fanmir Mon Leker’ ki zisteman pour fer sa kalite ledikasyon avek bann fanmir.

“Nou pa pou manke pour kre ankor lezot loportinite pour nou edik bann fanmir lo sa size. Me i annan bann fanmir ki pe fer zefor pour pran swen avek zot bann pros e mon profite pour felisit e ankouraz zot e dir avek lezot dimoun pour osi swiv sa bann legzanp e fer parey.

Antretan Minis Zialor in fer resorti ki son minister napa okenn nouvo polisi ou kriter ki’n met anplas ou pe al ganny met anplas pour asiste dimoun aze ki dan bezwen. I dir ki bann kriter pour admet dimoun dan bann rezidans dimoun aze i ankor parey.

Me ki sitiasyon aktyel ansa ki konsern bann rezidans dimoun aze dan pei? Lo sa size PS Roucou in dir ki i annan vreman bokou demann pour en plas dan bann rezidans pour dimoun aze.

“Zis pour sa lannen tousel i annan plis ki en kenzenn dimoun lo lalis pe espere. Me departman lafanmir nou kontinyen ankouraz bann manm fanmir pour okip zot bann vye paran me anmenmtan i dir departman lafanmir pe travay tre pros avek diferan antite pour ogmant sipor pour sa bann dimoun e osi zot fanmir,” Msye Roukou i dir.

I’n enform bann manm Lasanble ki ansemoman zot an diskisyon avek Bord Lenvestisman Sesel dan demars pour ganny en bout later pour konstrir en fasilite rezidansyel kot bann dimoun aze ki ankor endepandan ava kapab reste, annan osi en nursing home kot bann dimoun aze ki bezwen latansyon medikal 24 lo 24 ava kapab reste e zot pe osi diskit posibilite pour annan bann fasilite elderly day care kot bann fanmir ava kapab kitzot bann vye paran pandan letan ki zot al travay.

Me vi ki gouvernman oparavan ti’n deza konmans serten konversasyon lo demars pour ankouraz sekter prive pour investir dan bann tel fasilite parey i deza annan enn Anse Etoile kot bann dimoun ki kapab i peye pour kit zot fanmir alor ki zistans sa bann demars in arive? Lo sa pwen PS Roucou i dir ki sa diskisyon ti’n deza ganny fer avek Bord Lenvestisman e trwa kriter ti’n deza met anplas pour etabli bann tel fasilite me malerezman ti napa bokou dimoun prive ki ti vin devan e montre lentere me i dir zot in revwar ankor bann kriter e remet devan sa bann morso later ki disponib kot sa bann fasilite i kapab ganny konstrir e ankouraz dimoun dan prive pour envestir dan bann tel fasilite.

Marie-Anne Lepathy