Follow us on:

Facebook Twitter LinkedIn YouTube

National Assembly

Travay renovasyon ek konstriksyon nouvo fasilite pe al konmanse byento lo Lenstiti Lagrikiltir |03 August 2022

Travay renovasyon ek konstriksyon nouvo fasilite pe al konmanse byento lo Lenstiti Lagrikiltir

Minis Valentin pandan enn son vizit kot Lekol Lagrikiltir Anse à la Mouche avan ki I ti bouz kot Lekol Grand Anse primer

Lenstiti Lagrikiltir ek Ortikiltir Anse à la Mouche pe al ganny renove e serten fasilite ganny konstrir dan kad premye faz proze pour refer sa lenstitisyon e retourn bann etidyan ki ansemoman pe swiv kour dan en parti lekol Grand Anse Mahé primer.

Se Minis pour Ledikasyon, Dr Justin Valentin, ki ti dir sa dan Lasanble yer bomaten.

I ti osi enform bann manm ki sa lenstitistyon in fini transfer avek departman lagrikiltir e i pou sorti anba Minister Ledikasyon.

“Sa i akoz nou anvi ki sekter lagrikiltir i zwe en gran rol dan promosyon laprantisaz ki egziste kot sa lekol e nou anvi vwar plis reisit dan sa lekol. Nou pe osi demann bann zofisye dan departman lagrikiltir pour vin avek bann nouvo kour ki ava atrakte bann lezot kalite etidyan pour swiv kot sa lenstitisyon,” Minis Valentin in fer resorti.

I annan aktyelman anviron en santenn etidyan ki pe swiv bann kour kot sa lenstitisyon ansemoman.

Minis Valentin ti donn sa bann detay ler i ti pe reponn en kestyon par MNA pour Baie Lazare, François Adelaide, lo sa size.

Dapre Minis Valentin premye faz sa travay renovasyon lo sa lenstitisyon pou konpri renovasyon trwa blok prensipal ki deza la e travay pe finalize pour ki tender i lanse tre byento.

Minis Valentin in dir ki konstriksyon en nouvo lekol Lagrikiltir/Ortikiltir ti enn parmi bann proze ki ti pou ganny finanse atraver en lòn anba Kuwaiti Fund depi 2014 me ki pa’n zanmen materyalize.

I’n fer resorti ki depi ki i responsab Minister Ledikasyon in toultan santi li zennen avek sa laranzman kot bann etidyan sa lenstitisyon pe partaz menm lespas avek en lekol primer.

I dir ki apre plizyer refleksyon ek diskisyon ansanm avek lekip zesyon ek gouvernans Lekol Lagrikiltir/Ortikiltir zot in swazir sa bann opsyon swivan;

-           Konstriksyon sa nouvo lekol pou nepli form parti sa lòn Kuwaiti Fund.

“Nou’n rod finansman avek gouvernman Sesel pour nou kapab tre prosennman retourn sa lekol Anse à la Mouche.

“Tou lezot travay pou ganny konsidere dan dezyenm faz sa proze ki pou ganny fer an 2023. Bann travay i enkli demolisyon blok laklas prefab e konstriksyon en blok kat laklas. Sanzman lokasyon semen ki al kot bann propriyete agrikol deryer laferm, reamenazman bann fasilite elevaz zannimo ki enkli konstriksyon nouvo fasilite, amelyorasyon ek konstriksyon bann nouvo fasilite pour prodiksyon agrikol e osi konstriksyon nouvo fasilite pour farm managers. Plan travay in pare e semenn pase direktris sa lenstitisyon ti ganny sans verifye e agree avek sa travay e aprezan i reste pour Lazans Lenfrastriktir prezant avek Minister Ledikasyon e minister responsab pour lagrikiltir pour donn zot laprouvasyon final pour ki sa proze i al lo tender,” Minis Valentin in eksplike.

I’n osi dir ki zot in deside pour rod finansman pour sa lekol avek gouvernman akoz zot anvi ki sa lenstitisyon i bouze vi ki i annan retar avek sa lòn Kuwaiti Fund.

Minis Valentin in osi dir ki bann lekip zesyon pe osi konmans mazin bann lezot alternativ eksitan parey external campus kot bann laferm ek letablisman relevan pour lagrikiltir ek ortikiltir ava ganny servi konman bann lokasyon laprantisaz e lantrennman.

Dan en kestyon siplemanter Onorab Adelaide in demann Minis Valentin en garanti ki bann etidyan sa lenstitisyon i vreman ganny sa lenportans neseser parey lezot lenstitisyon pour vreman form bann zenn pour pran larelev pour sekirite alimanter e ki sa bann zenn ki swiv formasyon dan sa lenstitisyon i vreman ganny valorize e non pa ganny met dekote pour ki plis zenn i ganny ankouraze pour zwenn sa lenstitisyon pour kapab kontinyen protez nou sekirite alimanter.

Lo sa pwen Minis Valentin in asir bann manm Lasanble ki sa lenstitisyon pou ganny tou lenportans ki i merite.

Antretan dan en lot kestyon Onorab Adelaide ti anvi konn detay konsernan lespas kot sa lenstitisyon vi ki en lot biznes pe deza partaz menm lespas. Lo sa pwen Minis Valentin in konfirmen ki i annan en lakonpannyen Sinwan ki pe partaz sa laferm avek sa lenstitisyon e ki zot annan en lease 30-an. I dir sa lagreman ek laranzman ti dan kad korperasyon Sinwan Sesel e sa ti pour fer ki bann etidyan i eksperyans laprantisaz lagrikiltir dan en fason modern me i dir sa lagreman pa’n zanmen ganny respekte.

“Sa MoU ki zot ti sinyen an 2012 pa’n zanmen ganny respekte, in toultan annan en baryer langaz menm si dapre langazman ti pou annan en Seselwa lo laferm, sa pa’n zanmen leka. Ansemoman laferm in avarye e napa travayer. Laranzman pe ganny fer pour kas sa lagreman osito posib e si sa i arive, an Out sa lannen sa lakonpannyen Sinwan in ganny averti lo sa desizyon e apre sa departman lagrikiltir i ava rod pli bon fason pour servi sa later,” Minis Valentin in fer resorti.

 

Marie-Anne Lepathy

 

 

 

 

More news