Leko tanbour moutya i fer rezonnen Victoria Par Laura Pillay |05 September 2022
Leko tanbour moutya ti rezonnen dan lavil Victoria Sanmdi swar, anmezir ki bann santer ek danser diferan laz ti zwenn ansanm pour delivre en spektak inoubliyab.
Sa ti pour mark klotir premye Lafet Moutya Sesel.
Organize par Lazans Kreativ Sesel (CSA), premye selebrasyon Leko Tanbour otour Lorloz ti en levennman piblik kot bokou ti’n rasanble depi byen boner, an selebrasyon sa ladans tradisyonnel ki’n resaman ganny rekonnet par Lorganizasyon Edikasyonnel, Siyantifik e Kiltirel Nasyon Ini (Unesco), konman en form leritaz entanzib.
Kat diferan group ki konpri mizisyen, osi byen ki danser ek dansez, ti anim Lari Pierre de Possession ki ti’n fermen espesyalman pour sa levennman, konmansman 7er diswar ziskwa byen apre 8.30. Parmi sa kat group ti ‘Fek Arive’ sorti Mahé, ‘Vwazen’ ki osi sorti Mahé, ‘Latanier’ sorti Praslin, e osi group ‘Masezarin’ ki sorti La Digue.
Pour sa levennman, parey tou lezot organize pandan semenn pase dan kad sa lafet, bann danser ek dansez ti melanze – trwazyenm-az osi bann ki zenn, anba direksyon kreativ Raymond Clarisse.
Apre ki sak group ti perform endividyelman, zot ti zwenn ansanm pour en performans spesyal ki ti byen apresye par bann spektater. Bokou ti sezi en loportinite pour zot montre zot talan zot osi e selebre sa ladans tradisyonnel, par zwenn bann danser ek dansez dan milye semen.
Swivan sa spektak otour lorloz, latroup ti bouz ver Camion Hall kot Lazans Lantrepriz Sesel (Esa) ti’n osi organiz en levennman spesyal pour koensid avek lafet moutya.
“In vreman enteresan, e mon ti ava kontan si bann ki konsernen i kapab organiz ankor bann levennman parey. Konman en paran, pour mwan in en sans pour mwan reviv enkou mon lanfans, letan nou ti abitye al moutya lo lans oubyen dan distrik avek nou granparan. I’n osi enteresan pour mon bann zanfan, akoz zot kapab vwar en morso nou kiltir, eksperyans li zot osi, menm si i pa en leksperyans toutafe parey. Me, selman, in en bon sans pour zot vwar mannyer bann ki avan nou ti praktik nou tradisyon,” Madanm Sheila Dupres ti dir.
Pareyman, Madanm Myriam Freminot ti partaz avek Seychelles NATION son lakontantman ki moutya in finalman ganny son plas dan Sesel.
“Lontan nou sipoze pe met lanfaz lo nou bann ladans, bann tradisyon e kiltir ki pe perdi. Mon toultan kontan, e aport mon sipor pour bann tel keksoz, akoz bann zenerasyon ki pe monte pa pou konnen, pa pou ganny sans aprann bann diferan laspe nou kiltir si napa promosyon, e bann tel aktivite. I pa devret zis enn fwa, me en keksoz ki fer tanzantan,” i ti dir.
Pandan lasemenn, plizyer aktivite ti’n organize tel ki latelye moutya pour aprann plis lo sa ladans e ki mannyer pour fer tanbour moutya vize ver bann zenn, en sware spesyal pour bann viziter ki an vakans Sesel kot lotel Club Med, St Anne, osi byen ki sa selebrasyon spektakiler Sanmdi.
Nou seleksyon portre i montre e pe lanbyans pandan sa sware moutya Sanmdi otour lorloz dan sant lavil.
Laura Pillay
Portre par Louis Toussaint
