Poenm par Reuben Lespoir   |07 September 2022

Mis

Get mwan pe antre

Tou pti ... tou inosan

Me ou mis

Ou ti war en zetwal briyan

Barbot mwan avek lekritir ek literatir

Zwe, Konte, mezire

Priye !

Dispit osi pa ti manke

Tou sa ki ou ti santi, mon merite

Annandeler mon demande

Ler Bondye ti kre  ou

Ki i ti pe mazinen?

Konmsi get ou …

Elegant, zis bon, zis lo la

Ou moutay ou samousa

‘Ou chocolate’ ou ‘vanilla’

‘2 in one’ konmsi koze

Ou zoli en !… pa zis ou vizaz mon pe note

Me ou leker ... ou fason fer

Ou kas lo ou senk sou, ou a kwar i pli ser

Menm ou bonzour i lo en ler

Ou a kwar ou pa oule vye tou

Mon asire ou byen sikre e byen dou

Wi

Bondye i’n byen rakomod ou

Si ou ankor la

Si ou ankor pe rod fason pou kontribye

Se akoz ou leker i bat la

Pa dir ankor sa zafer ‘retrete’, ‘mon’n fatige’

‘Ar mwan, mon’n arete....’

Ki mannyer ou pou aret sa ki koul dan ou lavenn ?

Sa ki fer ou vire e devide lo sa lili

Sa ki fer ou poz en milyon kestyon

Menm si i annan en milyon rezon

Mis

Laklos i’n sonnen depi byen lontan

Me menm si ou anvi al dan lakour

Ou konnen i annan ankor bokou pour fer

Sirtou kan o fon ou leker

Ou santi ou annan sitan pour ofer

Alor asiz lanmenm avek mwan

Montre mwan mannyer zot  ti fer,

Montre mwan mannyer zot pe vizyonnen pour fer

E ansanm nou  a ganny bann nouvo fason fer

En nouvo direksyon

En nouvo lim

En nouvo parfen ...en nouvo loder

Mon santi li deza pe filtre dan ler

Ti evidan dan sa kalite latmosfer

Sa mazik i ankor vivan

Sirman i pour la, pour bokou letan

mis...

travay i la dan sa zarden

me avek sa ta travayer

sa pasyon, sa determinasyon, sa lantouzyasm ek viger

pa mwan, pa ou, pa li

me se Sesel ki pou venker

© Ben ²²