Mesaz sosyete sivil pour Lazournen Enternasyonal Volonter |06 December 2022

Ceps i remersye bann volonter pour zot langazman

“An komemorasyon Lazournen Enternasyonal Volonter, ki ti yer le 5 Desanm, platform sosyete sivil Sesel (Ceps) in remersye tou lasosiasyon, lenstitisyon ek sitwayen ki reste touzour angaze pour fer en diferans dan lavi lezot ek devlopman nou pei san ki zot pe ekspekte en rekonpans.

“Nou’n resaman konmemor plizyer lazournen enportan tel ki lazournen pour bann dimoun avek dezabilite, lazournen kont vyolans anver endividi e osi byen lazournen SIDA. Se byensir bann volonter ki fer ladiferans ! Ozordi i sa zour ki nou salye sa bonn volonte bann endividi ki touzour pe kontribye. Nou remersye zot senserman e swete ki zot legzanp i reste touzour en lenspirasyon pour lezot.

“Ceps i ankor enn fwa souliny lenportans ki sak sitwayen i annan pour zwe dan son devlopman personnel, familyal, kominoter e pei an zeneral.”

Kominike sorti kot Ceps