34enm Festival Kreol – Pyes Teat ‘Esper Godo’ ‘Esper Godo’ – en pyes ki fer loner literatir e met an valer levolisyon lalang Kreol |19 October 2019
Alokazyon 34enm Festival Kreol, bann fanatik teat ek manm piblik an zeneral pou ganny sans vwar enn parmi bann pyes teat avek en gran valer entelektyel, apard ki son laspe komik e komedi.
Sa i pyes ‘Esper Godo’, en enterpretasyon an Kreol Seselwa louvraz Samuel Beckett avek tit Waiting for Godot ki’n ganny tradwir an Kreol pa Madanm Marie-Thérèse Hossen.
Sa pyes, ki’n ganny met an senn par Christian Servina, i en kolaborasyon ant Liniversite Sesel avek komite lorganizasyon Festival Kreol.
‘Esper Godo’ i en pyes ki tourn otour de karakter prensipal – Vladimir (Didi) ek Estragon (Gogo) – ki pe esper en nonmen Godo, me pa zanmen arive.
Pandan ki zot pe espere, zot angaz zot lekor dan bann diferan senaryo ek diskisyon, e anmenmtan zot fer rankont avek trwa lezot karakter.
Apard ki Msye Servina limenm, bann lezot akter prensipal dan sa pyes i enkli Roxy Athanase, Danny Volcy ek Lisette Servina.
Dapre Dwayenn pour Fakilte Lar ek Devlopman Sosyal kot Liniversite Sesel, Madanm Joëlle Perreau, sa pyes i en fason pour montre ki distans Kreol in evolye e arive lo nivo akademik.
Madanm Perreau in azoute ki nou annan en gran privilez Sesel pour annan bann dimoun ki posed sa abilite pour tradwir, met an senn en tel pyes an Kreol ki nou lalang maternel, e fer li aksesib e konpreansib pour mazorite Seselwa.
I dir ki sa i osi en fason pour met lalang Kreol, e osi bann profesyonnel Seselwa, a loner.
I’n egalman azoute ki sa pyes i osi ilistre levolisyon Kreol, vizavi lezot lalang, ensi ki bann gran travay literer.
Apard en vedet dan domenn teatral Sesel, Msye Servina, ki en profeser lenformatik kot Liniversite Sesel, in dir ki sa pyes in ganny mete dan en konteks Kreol Seselwa, me toutan respektan bann konvansyon ek norm ki enplike.
I’n osi eksplike ki sa pyes i en kontinyasyon lezot travay lepase ki ti osi ganny enspire par bann travay literer tre koni.
An sa ki konsern bann akter pour sa pyes, Msye Servina in eksplike ki in swazir sa menm group akter ki in travay avek avan, vi ki zot deza annan sa leksperyans e abilite pour en tel travay.
Touzour konsernan bann akter, sa meter an senn in azoute ki vi ki letan pour preparasyon ti tre kourt, in alors swazir en group eksperyanse ki kapab asimil senaryo sa pyes ase vitman.
Tiket pour sa pyes, ki pou ganny zwe kot Sant Konferans Enternasyonal Sesel (ICCS) Lendi le 28 Oktob ki osi Lazournen Enternasyonal pour Lalang Kreol, i kout R200.
R.D.
