Kominike Lapolis |22 March 2025
En zenn-onm 21-an i rimann 12 zour an detansyon lapolis
En zenn-onm 21-an sorti Anse Gaulette, Baie Lazare, in ganny rimann 12 zour an detansyon lapolis konman sispe dan ka kas batiman e vole, reziste larestasyon, trespas kriminel e andomaz propriyete.
Sa sispe ti komet sa bann lofans le 18 Mars 2025 dan rezyon Por Lapes Artizanal anvil.
******
Alain Rildy Sauzier i ganny sarze pour plizyer lofans
Alain Rildy Sauzier aze 46-an sorti Anse Aux Pins in formelman ganny sarze devan Lakour Mazistra Anse Royale pour lofans kas lakaz e vole, vol an servan vyolans e kas batiman e vole.
Lapolis atraver prosekisyon ti anmenn en mosyon pour demann lakour, ki Sauzier i kontinyen ganny garde lo rimann anvi natir sa bann lofans ki in komet ki tre serye. Mazistra ki ti pe ekout sa ka, ti akord demann prosekisyon e rimann Sauzier Prizon Montagne Posée ziska dernyen determinasyon dan son ka.
******
Rio Rath i kondann 18 mwan prizon pour lofans lagresyon fizik lo en zofisye lapolis
Rio Rath aze 23-an sorti Anse Aux Pins in kondann 18 mwan prizon devan Lakour Mazistra Anse Royale. Sa i pour lofans lagresyon fizik lo en zofisye lapolis.
Prosekisyon ti fer sorti devan lakour ki Rio Rath i en endividi ki kontinyelman repet bann lofans parey, ki i ti’n deza kondannen dan en ka parey oparavan, kot i ti’n ganny en santans sispann, e in komet sa enn lofans pandan letan ki son santans sispann ti ankor aktiv.
Lofans lagresyon fizik lo en zofisye lapolis i anmenn en santans ziska 7-an prizon si ou ganny trouve koupab.
******
R. B. i kondann 6-an prizon pour lofans labi seksyel lo en miner
R.B aze 23-an sorti Mahé in kondann 6-an prizon devan Lakour Siprenm pour lofans labi seksyel lo en miner.
R.B ti komet sa lofans le 2 Zilyet 2021 kot i ti seksyelman abiz en fiy ki ti aze 15-an.
Kominike sorti kot departman lapolis