Follow us on:

Facebook Twitter LinkedIn YouTube

Entertainment

Auspitious i lans albonm ‘Demontre sa ki ou merite’ |28 November 2019

Auspitious i lans albonm ‘Demontre sa ki ou merite’

Auspicious pandan bann diferan performans

Zenn artis Seselwa Auspitious in prezan e aktiv lo lasenn lanmizik pandan sa bann dernyen lannen, kot in osi gany rekonnet konman Meyer Nouvo Artis (Zonm) Cable Awards 2018. Pandan sa pti pe letan, sa zenn talan in ganny rekonnet konman en zenn pozitiv ki annan en leker pour lezot zenn, e ki pe tras en larout enpe diferan avek bann lezot artis dan son kategori laz, atraver son bann mesaz motivasyonnel e emouvan.

Malgre ki i’n kolabor avek lezot artis lo bann travay mizikal, sa zenn talan prometan in deside travay e lans son prop albonm ki annan pour tit ‘Demontre sa ki ou merite’. Sa morso travay ki ti ofisyelman lanse le 11 Novanm, i konpri 20 sanson diferan zanr tel ki sega, zouk, dancehall e reggae parmi lezot, baze lo diferan tenm enkli lanmour, lavi spirityel osi byen ki lavi an zeneral.

« Mon annan diferan sours lenspirasyon letan mon pe rikord lanmizik, bann keksoz ek sitiasyon ki mon trouve otour mwan e mon bann lobzervasyon. Pour mwan, lanmizik i en veikil par ki en artis i kapab pas en mesaz e mon vwar li enportan ki sa mesaz i pozitiv e i osi enspir lezot otour mwan, ».

« Tit pour sa travay ‘Demontre sa ki ou merite’ i zisteman sa ki mon pe kominike. I en statement tre pwisan ki aplik pour tou kous dimoun e ki mon pe sey fer resorti par sa se ki si ou anvi akonpli en keksoz, ou bezwen envestir ou zefor ek letan e fer sakrifis e travay pour tras ou larout. I osi aplik dan sans ki en endividi i bezwen annan disiplin ek kontrol e parfwa, bezwen rezerve dan serten sitiasyon, » Auspitious i dir.

Parmi bann morso lo sa albonm i ‘Ziska Lafen Letan’ ansanm ek Sandra, ‘Ankor Plis’ avek Chicco, ‘Fer Tranble’ avek Cus Mun, ‘Nou pa pou fail’ e ‘True Love’ avek Xtra Big. Plizyer lezot artis in kolabor avek Auspitious lo son premye albonm tel ki Mercenary, Pas N’ Besa, Ion Kid ek Sandra.

Tou bann sanson lo sa travay in ganny ekrir par Auspitious limenm espesyalman pour sa travay, eksepte ‘Mon Kontan Ou’, premye sanson ki ti lans karyer Auspitious e par ki in ganny popilarite. Laplipar in rikord kot XTra Big Sounds tandis ki trwa sanson in rikorde par Ion Kid.

“Mon trouve ki i annan en kantite negativite ek bann move lenfliyans ki otour nou e bann zenn pe perdi zot semen. Mon lentansyon se pa zis pour promot lanmizik konman en form lar me osi pour pas en mesaz pour motiv nou bann zenn, » i ti azoute.

Dapre Auspitious, i pe resevwar bokou felisitasyon lo son premye albonm e bokou bann fans pe montre zot lapresyasyon.

Albonm i anvant kot Dara’s Plus (ex-Kot Do) pour R125 e osi dan lanmen pour R100.

 

Laura Pillay

More news