Kominike Lapolis |24 May 2025
Neddy Florentine i ganny sarze dan en ka vol an servan vyolans
Lakour mazistra in formelman sarz Neddy Florentine aze 42-an sorti Beau Vallon, pour en ka vol an servan vyolans. Florentine ti komet sa lofans le 12 Me 2025, Castor Road, English River kot i ti rantre dan en lakaz, servi vyolans pour menas en madanm 90-an, apre vole.
Florentine pe rimann prizon Montagne Posée apre ki i pa’n reisi onor bann kondisyon ki lakour ti’n enpoze lo li. Sa se pour pey en kosyon 15 mil roupi pour son liberte provizwar e prodwir 2 dimoun konman en garanti 7,500 roupi sakenn.
Si i arive fer sa peyman i pou ganny large e la i pou bezwen siny liv lakour dan kordgard Beau Vallon 2 fwa par semenn e pa enterfer avek temwen ek konplenan dan sa ka.
******
En zonm Sid Afriken i kondannen pour lanmor son pti baba
Lakour Siprenm in kondann en zonm nasyonalite Sid Afriken, Stephan Holtzhausen aze 36-an pour lofans ‘causing harm by way of unlawful omission’. Sa i dan ka kot son pti baba ki ti aze 17 mwan a sa letan, ti noye dan en basen naze kot en letablisman touristik Val Mer, Baie Lazare le 17 Mars 2024.
Ziz in pran plizyer konsiderasyon avan pas santans lo li, vi ki dan son pledwari, ladefans ti’n fer sorti ki sa akize ti’n pled koupab a son premye lenstan kan i ti’n ganny loportinite ki fer i pa’n gaspiy letan lakour e admet son tor. Sa akize ti’n dekri sa lensidan konman en troma ki pou mark li tou son lavi, e konmsi in kondann en lavi prizon lefe in perdi en zanfan dan en lensidan trazik. Sa apre ki in tonm dormi pandan letan i ti pe vey son zanfan.
Ziz ti fer resorti ki sa akize ti en viktim son prop krim, zis akoz i ti’n tonm dormi a en moman donnen, e napa levidans ki montre ki in komet sa lofans avek lentansyon. Ziz ti alor kondann Holtzhausen en term 3 mwan prizon, me ordonnen ki son santans i sispann pour en peryod 1-an.
******
Jean-Claude Forte i kondannen pour lofans drog
Lakour Siprenm in kondann Jean-Claude Forte aze 40-an sorti Mare Anglaise pour lofans kiltivasyon en drog kontrole e pour an posesyon en drog kontrole. I ti annan 31 plant kanabis e 142.50 granm kanabis zerbaz.
Ziz in kondann Forte en term 2-an prizon ek en lanmann 10 mil roupi, dan sa ka kiltivasyon, e 1-an prizon ek en lanmann 5 mil roupi dan sa ka posesyon en drog kontrole. Ziz in ordonnen ki son santans i sispann pour en peryod 4-an.
******
Daniel Jeanne i ganny sarze pour vol
Lakour Mazistra in formelman sarz Daniel, Bernard Jeanne sorti Mont Buxton dan en ka vol. Mazistra in larg Jeanne lo sa bann kondisyon swivan; en bail bond 5 mil roupi, pour pa komet okenn lofans parey e pour pa enterfer avek okenn temwen dan sa ka. Jeanne pou repas devan Lakour le 6 Zen 2025.
I ti komet sa lofans le 14 Me 2025, dan rezyon Lavil. Sa i apre ki i ti’n anmas en kart ATM e servi sa kart dan serten magazen pour fer tranzaksyon lo la.