Up Close avek Walter Bertin, en zonm ki pe viv avek en dezabilite |17 March 2026

‘Pa les dyabet vin en baryer dan zot lavi, kontrol li e pa les li dekontrol zot’

Par Mandy Bertin

Mon debout e regard en dimoun ki annan en dezabilite fizik kot i pe riye e fer fars. Pour li, son dezabilite pa pe anpes li viv son lavi e reste zwaye dan son prop fason. I pe viv avek lespwar ki son lavenir pou enn pli meyer.

Bann tel endividi i parfwa fer nou poz serten kestyon. Akoz ki nou ki kapab marse, koze, vwar kler e annan en lekor an bonn sante, nou viv dan latristes, depresyon e menm perdi nou dignite zis akoz en relasyon in terminen, en sitiasyon finansyel, en promosyon ki nou prosen in gannyen, ouswa akoz nou pa pe kapab al vwayaz aletranze pour le moman.