Follow us on:

Facebook Twitter LinkedIn YouTube

Politics

Mesaz Lannen/New Year messages |31 December 2019

‘Mon swete ki lannen 2020 i ava vreman en bon lannen pour nou pei e pour tou Seselwa’

 

“Ser ek Frer Seselwa,

“En nouvo lannen i konmanse. Dan lannen 2020, pou annan bokou selebrasyon. Enn bann selebrasyon pli enportan se pour mark 250-an depi ki bann premye zabitan ti vin Sesel. Sa moman i enn ki pou fer nou mazinen ki nou ankor en zenn nasyon konpare avek lezot pei. Letan ou mazinen ki 250-an pase, ti annan serten pei ki ti’n fini ganny zot lendepandans, e zot ti pe devlope ekonomikman, e zot ti pe travers lemonn, e se par sa aksidan ki Sesel ti ganny dekouver.

“Alor, nou Seselwa, i annan en kantite refleksyon pour nou fer. 2020 i pou en moman kot nou pou bezwen regard lavi limenm li dan en fason serye. Annou konmans par nou menm, regard nou sirkonstans, si nou pe travay dan en fason ki vreman donn nou sa rannman pour nou kapab siport nou fanmiy, siport nou zanfan, siport nou lazenes, ki ozordi i annan bokou bann defi ki zot fer fas avek.

Me apre sa, i enportan pour nou regard nou kominote, ek nou pei, parski sa osi tou i nou responsabilite. Regarde kwa ki nou, nou kapab fer pour amelyor sitiasyon dan nou pei. Kwa ki nou kapab donn anplis pour nou fer keksoz progrese. Kwa ki nou kapab fer an mwens pour nou kapab permet lezot akonplir zot rev.

“Donk, pour mwan 2020, i en moman kot tou Seselwa pou bezwen ekout byen sa ki pe arive otour zot. Fer sir ki nou regard byen e anplis ki sa fer sir ki nou konpran byen.

“Annou pa les nou ganny divage par tou kalite mesaz, me annou atas nou avek laverite, avek sa ki drwat, avek sa ki byen, pour ki nou pei, nou fanmiy, nou tou, nou ava kapab fer en progre.

“Byensir an 2020, apard selebre larive bann premye zabitan Sesel, nou pou osi annan en desizyon enportan pour pran, e sa se eleksyon Prezidansyel. Dan en serten sans sa eleksyon i pli enportan ki bann lezot ki’n arive avan, akoz i pou en pwen defini dan nou listwar. I pou determinen si nou pou avans devan dan en fason definitiv, oubyen si nou kontinyen kale lanmenm. Se pour sa rezon ki mon dir ekoute, regarde, e anplis ki sa, reflesir e analize.

“Donk, pour ou ki pe etidye, mon ti a kontan dir avek ou kouraz touzour. Toultan mon dir avek bann zenn, zot annan en sel priorite, zot letid, se sa ki pou fer zot vin sa ki zot ti a kontan vini dan lavi.

“Pour bann lazenes, ki nepli pe lekol, mon dir avek zot, fer atansyon bann move frekantasyon, bann move vis ki kapab detrir ou lavenir, alor kouraz e gard ou 'focus' lo sa ki ou, ou anvi. Pa les dimoun fer ou, vin sa ki zot, zot anvi.

“Pour tou travayer, ankor ennfwa mon debout lo zot kote pour siport zot. Mon konnen ki san zot, pei limenm li, pa pou avanse. E la mon mazin espesyalman bann travayer Seselwa. Annou repran nou pei. Annou donn enpe plis, pour ki etranze pa ava bezwen vin aras manze lo nou lasyet. Alor mon swet zot bokou plis kouraz, bokou plis konsantrasyon, afen ki zot a kapab vreman donn tou e nou, nou ava rekonstrir nou pei.

“Pour bann biznes, spesyalman bann biznes Seselwa, mon tir sapo avek zot, pour lafason ki zot pe travay e zot konnen ki mon pou donn zot tou sipor, parey mon abitye. Mon anvi ki zot ganny bann pli bon kondisyon, e ki pei limenm, i donn bann biznes Seselwa bokou plis lankourazman, e 2020, i ava sa moman pour nou kontinyen donn zot lakourazman.

“Pour zot ki’n pran zot retret, ankor ennfwa mersi bokou. Mersi pour zot kontribisyon. Zot in fer en kantite. E la dan zot retret pa oubliye ki zot kontinyen annan en kontribisyon pour fer. Dan lakour mon konnen ki zot fer en kantite keksoz, alor kouraz zot osi tou. Servi sa bann lenerzi ki zot annan pour zot kontinyen fer sa ki byen, pour diriz bann ki pli zenn, e pour gard zot lo bon semen.

Pour tou nou bann dimoun ki pa tro byen, ankor enn fwa mon swet zot lasante. I pa fasil letan maladi in anvair nou lekor, alor mon leker i avek zot, dan zot soufrans, mon swet zot kouraz, e mon priye ki si zot annan posibilite pour zot reganny zot lasante, sa i ava arive o pli vit posib. Me si zot dan bann sitiasyon kot zot lasante ek latizann pa pe mars byen, alor mon dir avek ou, kontinyen annan pasyans, priye, kontinyen viv dan sa trankilite.

“Seselwa, mwan, konman en travayer mon debout lo zot kote. Konman en dimoun ki anvi war sa ki meyer, mon mars avek zot. Konman en dirizan dan nou pei, ki anvi ki i annan sa transformasyon, mon kapab promet zot mon lafors, mon kouraz, mon lentelizans, e osi mon lasazes.

“Mon swete ki lannen 2020 i ava vreman en bon lannen pour nou pei e pour tou nou Seselwa.

“Mon swete ki 2020, i ava war ou rev, ganny akonpli.

“Mon swet ou kouraz, prosperite, tou sa ki bon, e mon swet nou pei sa vre rekonsilyasyon.

“Bonn Fet 2020.

“Bonn Ane tou Seselwa.

“Mersi Bokou.”

 

Wavel Ramkalawan

Dirizan Lopozisyon dan Lasanble Nasyonal

More news