US i deplor desizyon gouvernman pour ouver pei le 25 Mars |06 March 2021
United Seychelles (US) i konsider desizyon gouvernman pour ouver erport le 25 Mars pour tou viziter, eksepte bann ki sorti Sid Afrik, avek zis en rezilta PCR negativ 72 erdtan konman enn ki enpridan e iresponsab.
“I en lot legzanp kot sa gouvernman teti i deside enterfer dan lasante piblik e met a risk popilasyon Sesel, sirtou zanfan ek vyeyar, zis pour promouvwar lentere gro biznes e pour ganny enn de dolar anplis. Fodre note ki laplipar dimoun ki’n mor avek Kovid se nou bann dimoun aze e ki plis ki 250 miner in teste pozitiv,” US i dir dan en kominike.
“I malere ki ozordi pour sa gouvernman larzan i pli enportan ki lavi imen. Sa desizyon i vin a en moman kot to lenfeksyon Kovid Sesel i pli o dan lemonn e lakantite lanmor lye avek Kovid i ogmante tou le zour,” sa kominike i azoute.
United Seychelles i vwar plizyer problenm avek sa desizyon. “Premyerman, kontrerman avek sa ki gouvernman ti’n reasir lepep, ozordi zis 25% popilasyon in ganny dezyenm doz vaksen. Sa i reprezant 35% an mwens ki sa ki neseser pour ganny ‘herd immunity’. Dezyenmman, leksperyans in montre ki a plizyer lenstans touris/etranze ki’n vin Sesel avek tes PCR negativ zot in apre teste pozitiv isi. Pour sa i annan plizyer rezon, me lenportans se ki i annan gran danze ki nouvo varyan sa viris i ganny entrodwir dan Sesel. United Seychelles i osi okouran ki sel rezon ki nonm ka lenfeksyon Kovid pe desann se akoz bokou mwens tes pe ganny fer.
United Seychelles i osi note ki en progranm agresiv vaksinasyon pe pran plas san ki nou konnen ki kalite varyan Kovid pe sirkile dan pei. I fer preski 2 mwan ki United Seychelles ti enplor gouvernman pour determin varyan sa viris, me parey tou dimoun i konnen sa gouvernman otokratik pa ti ekoute. Fodre note osi ki vaksen ki pe servi isi pa neseserman efikas kont serten varyan Kovid. United Seychelles i osi pran kont ki dan zot kalkilasyon gouvernman pa’n enkli sa plizyer milye travayer etranze avek GOP ki ozordi pe viv Sesel.”
“United Seychelles i kontan pour note sepandan ki gouvernman in finalman ekout son konsey pour akseler progranm vaksinasyon ki United Seychelles ti fer preski 2 mwan pase. Ankor United Seychelles i panse ki gouvernman pe mal zer sa problenm e pe reakte dan en fason ‘piece-meal’ avek bi pour li kapab ganny en pe plis dolar dan sistenm banker.”
“United Seychelles i ankor krwar ki si gouvernman ti’n ‘lock down’ pei e fer en progranm vaksinasyon rapid ozordi Sesel ti pou dan en pozisyon pour ouver pei avek touris san gran danze. United Seychelles i swete ki avek sa desizyon gouvernman sitiasyon Kovid dan pei pa vin en pli gran dezord ki i ete ozordi.”
Kominike sorti kot United Seychelles
Not Editer:
Bann pwennvi eksprimen dan sa lartik i pour United Seychelles e pa neseserman reflekte lopinyon zournal Seychelles NATION.