Gro divan i koz dega, detrwa lakaz i perdi zot twa, avyon i sanz larout |24 July 2019
Gro divan yer in fer dega enpe partou kot detrwa lakaz ti dekouver antyerman ou parsyelman, pye dibwa dan plizyer landrwa ti blok semen me erezman personn pa’n ganny dimal.
Batiman zournal Seychelles NATION i enn parmi sa bann batiman ki’n sibir lefe sa gro divan apre ki i ti dekouver parsyelman.
Menm serten avyon – par egzanp Air Mauritius, Ethiopian Airlines ek Emirates – pa ti kapab apoze lo erport Point Larue e ti bezwen sanz larout.
Air Mauritius ti retourn Moris, Ethiopian Airlines ti al NosyBe Madagascar tandis ki Emirates ti al Kenya.
Lo son kote Air Seychelles ti sispann tou bann vol domestik depi 2.35 yer apremidi ziska nouvo lord.
Divan ki ti pe souffle ant 40 a 60km/hr depi bomaten e ti tant pour ranforsi lo apremidi, ti fer ki plizyer lakaz dan distrik Bel Air ti dekouver parsyelman e dan serten ka antyerman e koz enpe lafreyer parmi bann zabitan.
Biro Meteorolozi in dir ki sa sitiasyon kot divan i ekspekte par ler vante ziska 80km/hr pou kontinyen e ekspekte kalmi Merkredi dan lasware.
Vi ki nou dan letan vannswet bann gro divan parey i arive me sa sitiasyon in pli grav akoz en sistenm bas presyon.
Ti dan ver 4er edmi ler zournalis Seychelles NATION ti koz avek administrater distrik Bel Air, Madanm Alexandrine Zelia, e i ti dir ki ti anviron 2er apremidi ler biro dan distrik ti konmans ganny bann lapel konmkwa ki serten lakaz ti’n dekouver.
“Deswit travayer distrik ti mobilize e ansanm avek tim gouvernman lokal nou ti al lo teren pour vwar sitiasyon e ed sa bann fanmir. Kot bann tol pa ti’n sorti net zot ti rekloute me dan serten ka zot in met pwela pour protez sa bann twa ziska ler travay ava fini,” Madanm Zelia ti dir.
Lo son kote sekreter prensipal pour zesyon risk ek dezas, Msye Paul Labaleine, ti dir lo SBC ki DRDM in rikord 15 ka ki enkli pye dibwa tonbe, lakaz dekouver ek lezot dan plizyer distrik enpe partou e ki lamazorite sa bann sitiasyon in ganny deal avek vitman.
I’n lans lapel pour dimoun pran prekosyon kot zot lakour e pour pa sorti se zot si pa neseser.
Manm piblik i kapab telefonn 999 oubyen DRDM lo 2522622 pour raport okenn ka ki zot santi zot bezwen lasistans.
Bann portre ki akonpanny lartik i montre en pe dega ki sa gro divan yer in okazyonnen.
