Mesaz lider United Seychelles alokazyon Lazournen Mondyal Alimanter ‘Fodre zanmen nou zanfan i al dormi vant vid’ |16 October 2021
Lider United Seychelles Patrick Herminie in demann gouvernman atraver bann lenstitisyon konsernen pour promouvwar en polisi lasistans ek proteksyon sosyal pour nou bann sitwayen pli vilnerab pour asire ki nou zanfan pa zanmen al dormi vant vid.
Dr Herminie in dir sa dan son mesaz alokazyon Lazournen Mondyal Alimanter ki ganny selebre ozordi le 16 Oktob.
Mesaz Dr Herminie i lir koumsa :
“Toulezan, lemonn antye i selebre Lazournen Mondyal Alimanter pour fer nou rapel ki i ankor annan en kantite dimoun dan lemonn ki pa pe ganny ase pour manze.
“Malerezman, i ankor annan plizyer milyon zonm ek fanm ki ankor pe lite pour donn zot fanmiy en lasyet manze balanse.
“Le 16 Oktob i osi mark lazournen kreasyon FAO (Lorganizasyon pour Manze ek Lagrikiltir), alor nou zwenn avek lemonn pour elimin laprovrete e lafen par asir sekirite alimanter. I osi nou devwar pour promouvwar lagrikiltir soutenab avek bi amelyor kalite nitrisyon.
“Konman lider United Seychelles, mon le fer sosyete rapel ki nou bezwen defann nou bann aki sosyal; Sesel i parmi en ptigit pei dan lemonn kot sitwayen i benefisye avek omwen en repa par zour. Bann devlopman resan osi byen ki nou sitiasyon ekonomik pe menas sa aki.
“Lo non United Seychelles, mon pe alor enplor gouvernman atraver bann lenstitisyon konsernen pour promouvwar en polisi lasistans ek proteksyon sosyal pour nou bann sitwayen pli vilnerab pour asire ki nou zanfan pa zanmen al dormi vant vid.
“Mersi e ki Bondye i kontinyen fer provizyon pour nou.”
Patrick Herminie
Lider United Seychelles