Bann 3enm-az rezyon sid ek was Mahé i zwenn ansanm pour reviv zot Kreolite |30 October 2021

Portre : Joena Meme/DA Anse Royale

Fer kapatya, prepar banbou pour fer en kazye i parmi bann keksoz ki bann zanfan ozordi pa tro konnen, me yer bomaten plizyer zanfan lekol dan rezyon sid ek was Mahé ti ganny sans vwar e apresye sa bann keksoz ki form parti nou tradisyon konman Kreol Seselwa.

Sa ti atraver en latelye vivan ki ti deroul kot biro ladministrasyon distrik Anse Royale kot plizyer dimoun aze ti’n vini pour montre tou sa ki ti anvi, ki zot ankor annan talan e zot ankor tre aktiv malgre zot laz.

Madanm Marianne Philoé Adrienne sorti dan distrik Anse Royale ki tre doue dan fer bann travay artizanal ek lakoutir ti la pour osi montre son talan dan fer kapatya e i ti fer plizyer ki i ti donn bann zanfan lekol ki ti la.

«Si zot enterese mon kapab montre zot,» Madanm Adrienne ti dir sa bann zanfan ki ti pe regard li avek gran lentere.

Lo son kote Madanm Cecilia Adrienne ti pe montre bann kousen byen kolore ek bann paye sifon ki li ek enn son zanmi ti’n fer e ki ti osi anvant.

De ser, Lucie Confiance ek Gina Havelock sorti Baie Lazare zot zot ti’n vin avek bann travay brodri ek lakoutir ki zot dir zot ankor vreman kontan fer pandan zot letan lib.

Pour Msye Willy Bristol, en peser e fezer kazye sorti Takamaka, li i ti tre kontan pour montre detrwa zanfan lekol ki ti la ki mannyer pour prepar banbou pour fer kazye parey lontan nou gran pye ti fer.

Menm si ti napa tro bokou partisipan, Madanm Tasiana Docteur, ladministratris distrik Anse Royale, i dir i vreman kontan e apresye pour sa detrwa dimoun sorti dan bann distrik larezyon ki’n partisipe.

«I toultan ankourazan e nou kontan, nou pa kapab ekspekte plis vi sitiasyon Covid-19 ki pe kontinyen,» i ti dir an remersyan bann ki’n vini pour montre ki zot ankor kapab fer.

Ti osi annan lavant bann pti manzay parey nouga koko ek bann gato Kreol.

Ver 3er apremidi plis dimoun aze ti vini e abiye dan zot lenz tradisyonnel, zot ti fer en pti laserenad ki ti konmans vizavi bazar e al termin kot biro ladministrasyon distrik.

Akonpannyen par Royale Band, zot ti dans moutya e sant bann sanson tradisyonnel.

Kot biro ladministrasyon distrik en dife ti’n alimen pour sof tanbour moutya e sa bann dimoun ti byen danse.

«Nou vreman kontan ki nou aktivite in deroul parey nou ti’n planifye menm si i pa lo en gran lanpler. Me sa ki gou se ki bann dimoun aze in ganny sans pour sorti en kou kot lakaz e vin partisip dan keksoz ki zot kontan e ki fer zot reviv enpe zot fason viv lontan e pran en pti moman pour zwenn ansanm, diverti e egey kanmarad enpe,» Madanm Docteur ti dir.

I’n fer resorti ki sa rezyon pe mazin organiz en aktivite enpe parey pour lokazyon lafen lannen si sitiasyon Covid-19 i amelyore e zot ganny permisyon pour fer li.

Bann portre ki akonpanny lartik i montre serten moman for sa aktivite yer.

Marie-Anne Lepathy