Legzibisyon ‘Life Force’ i ouver kot Carrefour des Arts |18 August 2023
‘LIFE Force’ i non en legzibisyon par Colin Albest, en artizan aze 47-an ki’n aprann tou lo li menm.
Sa legzibisyon ki ti ouver resaman kot galeri Carrefour des Arts anvil in fer an kolaborasyon avek Konsey Nasyonal pour Lar e Lartizana.
Devan en group fanmiy e zanmi ensi ki bann reprezantan sa konsey, Msye Albest ti eksprim son lapresyasyon pour tou zot sipor ki’n fer li arive demontre son bann travay dan en legzibisyon profesyonnel.
«Mon remersye NACC (Konsey Nasyonal pour Lar e Lartizana) pour donn mwan sa sipor e pous mwan pour mont sa legzibisyon ki la ozordi. Mon parol i en pti pe senp e i al pour bann zenn artis. Pa limit zot lekor akoz lar i en talan ki for e kot en bon pe i kapab ganny devwale e dir san menm ekri en mo. Eksplor diferan teknik ki marse pour zot ki en zour zot ava arive montre zot travay zot osi,» Msye Albert ti dir.
Davis Padayachy, enn son zanmi pros, ti dir ki Msye Albest i annan en talan ekstraordiner ki tou dimoun i devret vwar e eksperyanse.
«Colin i en dimoun ki kontan partaze e i pou montre son konesans lar avek lezot e in toultan pare pour ed lezot,» Msye Padayachy ti dir.
Direkter egzekitif NACC Jimmy Savy ti osi fer son remark avan ofisyelman ouver legzibisyon. «Kot konsey nou byen kontan ki Colin in pran sa desizyon pour fer sa legzibisyon ozordi; en legzibisyon solo. I pe ede pour redonn valer lar ek lartizana dan Sesel e sa i vreman enportan,» Msye Savy ti dir.
Metabiel Henriette, en etidyan sorti dan lekol Lar (SIAD) i dir ki travay Msye Albest in ed li pour ganny plis lenspirasyon pour son bann proze ki i fer lekol.
«Sa bann form lar i montre mwan ki i annan plizyer metod kree en travay lar e i osi kapab ganny transformen dan diferan fason kot i pa toultan zis lakaz ek lesyel me bann abstre osi,» sa zenn etidyan ti eksplike.
‘LIFE Force’ i an se moman ouver pour piblik pandan lazournen ziska le 15 Septanm.
Nou prezant zot serten tablo kree par Msye Albest.
Teks ek portre : Diane Larame
