Lafwar agrikol lo Praslin ti en sikse |04 September 2019
Parey in le ka toultan, lafwar agrikol ki Lazans Lagrikiltir ti organize Amitié lo Praslin sanmdi pase ti en sikse. Minister Lapes ek Lagrikiltir e Lazans Lagrikiltir lo Praslin ti kapab regroup en kenzenn fermye lo sa zil pour pran par dan sa enn lafwar agrikol.
Sa i dan kad zefor sa minister pour ankouraz piblik pour aste e konsonm plis prodwi lokal. Serten fermye ti’n desann avek en gran varyete prodwi pandan ki lezot ti’n swazir pour konsantre lo zis enn ou de.
Lafwar ti konmans ver 8er bomaten kot biro Lazans Lagrikiltir e la en varyete legim, gro manze, fri, lavyann e lezot prodwi lokal ti an vant.
Ti osi annan plan zepis, dizef, bouden, graton, asar, masala, marmalad e zi fri lokal. Ti menm annan posibilite pour aste lapen e plas rekomann pour kabri pour bann ki ti pe rod en zannimo domestik.
Nouvo dan sa enn lafwar ti Msye Kenneth Albert, propriyeter ‘Seychelles Creole Spices and Condiments’ ki li ti pe entrodwir bann diferan melanz zepis an form lapoud tel ki masala ensi ki marmalad, piman kraze e lezot prodwi ki tou pe demontre en gou Kreol, an servan bann zengredyen lokal. En lot nouvo partisipan ti Seaweed Seychelles kot Msye Bernard Port-Louis ti pe fer lavant son ‘Liquid Plant Growth Promoter’ e ‘Seaweed compost’, de prodwi ki fer a baz gomon delo sale ki plizyer fermye lo Praslin i deza pe servi e ki zot in eksprim zot satisfaksyon avek.
«Nou apresye e satisfe avek zefor bann fermye pour partisip dan nou aktivite. Vreman i annan en gran varyete prodwi me toudmenm nou ti ekspekte ganny plis piblik pour vin aste bann prodwi,» Msye Jose Guerreiro, zofisye ekstansyon sinyor pour Praslin ek La Digue ti dir lo sa lafwar.
Bann fermye ti eksprim zot lapresiasyon pour en tel aktivite ki donn zot en loportinite pour fer lavertisman pour zot prodwi, ensi ki etabli bann nouvo relasyon sirtou avek bann biznes.
Sa i a ede adres enn zot bann difikilte mazer ki en mank lavant pour zot prodwi.
Dan zot lopinyon sa i en bon pa dan zefor Minister Lapes ek lagrikiltir pour asiste bann fermye me zot kantmenm santi ki i annan bokou plis ki kapab ganny fer, tel ki entrodwir en labank lagrikiltir e fer provizyon pour ki i annan bann lagrenn ki kapab siport nenport ki sezon.
Nou prezant sorti portre tire par Romano Laurence.
Teks : Nadia Bedier
